Adam ata Haýa anadan bastalǵan adamzat tarihynda jumyr jerdiń betine jaryq dúniege kelip ketip jatqan jumyr basty pende kóp. Biraq, sanaly ǵumyrynda sapaly is atqaryp, el tizginin tartar tektilik, daýǵa bitim aityp, buqaraǵa bilik júrgizip, aldymen atam qazaqtyń saltyna sai aq kiizge kóterilip Han sailanyp taqqa otyrý ekiniń biriniń basyna buiyra bermeitin baq dep bilemin.
Jalpy jer sharynda, búgingi álemde sonyń ishinde qazaq tarihynda jaratqannyń nury túsip, han sailanǵan (patsha, prezident) tarihi tulǵalar az emes.
Al endi aitqym kelip otyrǵany Nursultan Ábishuly Nazarbaev táýelsiz Qazaqstan memleketiniń tuńǵysh prezidenti.
Mine sondyqtanda N. Nazarbaev esimi táýelsiz qazaq eliniń tarihynda altyn árippen jazylyp qalary aidan anyq.
«Jaqsynyń jaqsylyǵyn ait, nury tassyn». Bilik basyna resmi kelgen kúninen-aq Semeidegi synaq poligonynyń jabylyp, Qazaqstan iadrolyq qarýsyz beibit memleket bolyp jariialandy. Bul meniń aitpaǵymnyń basy ǵana.
Nursultan Ábishuly bastaǵan bizdiń elimiz táýelsizdikke tái-tái basyp, qadamyn qaz-qaz basqan qazaq memleketi qaryshtap dami bastady.
Aq bilektiń kúshimen asyl erlerimiz qorǵap qalǵan darhan dalamyzda shekaramyzdyń zańdy túrde qazyǵy qaita qaǵylyp, tórt buryshymyzdy túgendep aldyq. TMD, BUU, ShYU t.b. halyqaralyq bedeldi uiymdarǵa múshe bolý arqyly memleketimizdiń álemdik arenadaǵy saiasi salmaǵy artyp, sálemimizdi almaityn kei memleketter saýlyǵymyzdy suraityn boldy.
Er etigimen sý keshken toqsanynshy jyldardyń toqyraýynan tosyrqamaǵan Nazarbaev apparaty, kerisinshe bolashaqqa bet túzep, Alataýdan bastalǵan kósh kerýenin arqaǵa qarai buryp, Esilge taban tiredi. Ary qaraiǵy áńgime Astana týraly bolatynyn boljai berińiz.
Erke esildiń eki jaǵyn en jailaǵan ajarly Astana N. Nazarbaevtai suńǵyla saiasi sýretshiniń avtorlyq qoltańbasy tárizdi men úshin. Sebebi este joq eski zamannyń ertegilerde sýretteletin ǵajaiyp han ortalaryn elestetimin men Astanaǵa barsam.
N.Á.Nazarbaev Qazaqstan-2030 strategiiasyn ýaqytynan buryn oryndap, damyǵan 50 memlekettiń qataryna enip, rýhani jańǵyrý jolynda tarihyn túgendegen uly dala eliniń ult kóshbasshysy men úshin.
Jyl saiynǵa dástúrli Joldaýy - el damýyn jańa beleske bastaityn strategiialyq qujat.
N.Á. Nazarbaevtyń 2019 jyldy jastar jyly dep, jariialaý týraly jarlyǵy prezident retindegi sońǵy jarlyqtarynyń biri de biregeii bolyp qala beretini beseneden belgili.
Oiymdy osy jerden túiindeiin. Ertede el basqarǵan bir han bilik qurǵan ýaqytynyń aiaqtalar tusynda bir sáýegeige kelip: "Men bilikti bosatamyn, biraq meni elimniń erteńi alańdatady.Sen maǵan osy eldiń bolashaǵyn boljap ber", - dep buiyrypty.
Sonda álgi sáýegei hannan sol eldiń jastaryn aldyna ákelýin surap, jastarynyń janaryna qarap: "Jastaryńnyń janarynda ot bar eken. Endeshe elińniń bolashaǵy jarqyn bolady" degen eken. Endeshe egemen eldiń erteńi sizben bizge amanat, qurmetti zamandas!
Jaratýshydan elimniń erteńin jarqyn, sábieriniń uiqysy tynysh bolýyn suraimyn. Táńirden tiler tilek sol qarǵa tamyrly qalyń qazaqtyń mańdaiy jaryq bolǵai!
Oljas Soǵymbai,
Semei qalasynyń jastar resýrstyq ortalyǵy
