Álem moiyndaǵan sarabdal saiasatker, kesek tulǵa Elbasymyzdyń esimi Qazaqstannyń táýelsizdigimen tyǵyz bailanysty. Nursultan Ábishuly úlken qairatkerliginiń, keleshekti tereńnen boljaityn kemeńgerliginiń arqasynda elimizdi tynymsyz órge súirep keledi.
«Ótkensiz bolashaq joq» demekshi, elimizde Elbasymyzdyń bastamasymen atqarylǵan tirlikterge sholý jasap óteiin. Qazaqstan óziniń táýelsizdigin jariialaǵannan keiingi alǵashqy jyldarda el jappai qiynshylyqty bastan ótkerdi. Jumyssyzdyq, jalaqy, zeinetaqylardyń ýaqtyly berilmeýi, urlyq-qarlyqtyń órshýi, basqa da túrli áleýmettik-ekonomikalyq máseleler halyqty biraz ábigerge salǵan-dy. Elbasy 2030 jyldarǵa deiingi damý strategiiasyn jasap, Qazaqstandy órkendetýdi júieli túrde kórsetip berdi. Memleket basshysy, sonda osy qiynshylyqtyń bári ýaqytsha ekenin, birte-birte tyǵyryqtan shyǵatyndyǵymyzdy eskertken edi. Mine, endi sol aitqany aidai kelip, damý jolyna tústik, qazaq elin búkil álem tanydy. Jumyssyzdyq azaiyp, jalaqy, zeinetaqy kóbeidi, ýaqytymen beriletin boldy, kásipkerlik keń óris aldy. Mamandarymyz biliktiligin arttyryp, jastarymyz «Bolashaq» baǵdarlamasy boiynsha shetelderdegi mártebeli oqý oryndarynda bilim alýda. Sonymen birge densaýlyq saqtaý, bilim salalarynda oń ózgerister kóp. «100 mektep, 100 aýrýhana» baǵdarlamasynyń qarqyndy oryndalýy, «Balapan» baǵdarlamasy aiasynda jańa balabaqshalardyń boi kóterýi de osy sózimizge dálel.
Saryarqa tórindegi ásem Astanamyz da jyl saiyn kóriktenip keledi. Ol 20 jyldan astam ýaqytta el ómirindegi barlyq igilikterdiń júzege asýyna muryndyq bolyp, jarqyn keleshekke Qazaqstan halqymen birge sátti qadam jasady.
Elimizdegi saiasi turaqtylyqty, beibitshilikti bizdiń basty jeńisimiz deýge bolady. Kórshi memleketterdiń kópshiliginde irili-ýaqty qaqtyǵystar, dúmpýler oryn alyp, ol berekesizdikter kóptegen adam shyǵynyna ákep soqty. Siriia, Egipet, Irak, Túrkiia memleketterindegi qandy qaqtyǵystarǵa qarap otyryp, deneń túrshigedi. Jazyqsyz ajal qushyp jatqan beibit halyqqa, sol elderdiń balalarynyń úreiden úrikken janarlaryna qarap janyń ashidy. Allaǵa shúkir, elimizdiń turǵyndary, júzdegen ulttar ashyq aspan astynda tatý-tátti tirshilik etýde, urpaq ósirip, órkenietke qarai qadam basýda.
Elbasymyz aýyl sharýashylyǵynyń órkendeýine de kóp kóńil bóle bastady. Ata-babamyz «Eńbek etseń emersiń» degen emes pe? Endi Úkimettiń bar múmkindigin paidalana otyryp, eńbektenińiz, kásibińizdi dóńgeletip, mal baǵyńyz, jer jyrtyp, ónim alyńyz... Baqyt pen jetistikke tek eńbek arqyly jetetindigimizdi Elbasy únemi aityp júredi.
Elbasynyń bar bitim-bolmysy halqymen bite qainasqan, júregi halqymen birge soǵyp, birge tynystaidy. Onyń qai baǵdarlamasyn alsańyz da, astarynda «halqym igiligin kórse eken, halqyma bolsa eken» degen qamqor kóńil turady. Qazaqstanda bala týý kórsetkishiniń kóbeiýine, ana men bala densaýlyǵynyń jaqsarýyna mol múmkindik jasap otyr. Járdemaqy jyldan-jylǵa kóbeiýde. «Nurly kósh» baǵdarlamasynyń arqasynda shetelderdegi qandastarymyz atamekenine oralýda. Bul – demografiialyq ahýalymyzǵa oń yqpalyn tigizýde.
Bir kezde qańyrap bos qalǵan aýyldardyń kúretamyryna qan júre bastaǵandai. Diqanshylyq jaqsy jolǵa qoiyla bastady, qurylystar salynyp, balabaqshadan sábilerdiń shat kúlkisi estiledi. «Diplommen aýylǵa» baǵdarlamasymen kelgen jastar aýyldardyń órkendeýine úles qosyp, qarqyndy eńbekterimen zamandastaryna úlgi bolyp júr. Elbasy «Qazaqstannyń Úshinshi jańǵyrýy: jahandyq básekege qabilettilik» atty Joldaýynda Úkimetke qadaý-qadaý tapsyrmalar berip, Qazaqstannyń áleýmettik-ekonomikalyq damýynyń sara jolyn nusqady. Bizge, aqsaqaldar qaýymyna da Úkimet tarapynan kóptegen qamqorlyqtar qarastyrylǵan. 1 qazannyń Qarttar kúni bolyp belgilenýiniń ózi qariialarǵa kórsetilgen úlken qurmet dep bilemin. Ardagerler, kóp balaly analar kezegimen shipajai, saýyqtyrý oryndarynda demalyp turady. Islam dinine bet buryp, Allanyń týra jolyna túsken imandy jastarymyz kóbeiip keledi. Aýyldardyń barlyǵynda derlik záýlim meshitter boi kótergen. Elimizde Prezidenttiń qoldaýymen «Mereili otbasy» ulttyq baiqaýynyń uiymdastyrylýynda da tereń mán jatyr. Iá, otbasynyń beriktigi, birlik-berekesi, mereii – Otanymyzdyń bereke-birligi. Otbasyndaǵy qundylyqtar, ulttyq sanadaǵy tálim-tárbie, salt-dástúrimizdi qurmettep, kózdiń qarashyǵyndai saqtaý – urpaqtarymyzdy izettilikke, meiirimdilikke, adaldyqqa tárbieleitini belgili. Al, jany izgi urpaq – Otanynyń baqyty.
Elbasy «Rýhani jańǵyrý: bolashaqqa baǵdar» atty maqalasynda ulttyq qundylyqtardy qasterleýge, rýhani jańǵyrýymyzǵa basymdyq bere otyryp, Qazaq elin biik belesterge bastaityn keń aýqymdy baǵdarlamalar qamtylǵan.
Meniń joǵaryda aityp ótkenderimniń barlyǵy Elbasymyzdyń saliqaly saiasatynyń arqasynda júzege asyp otyrǵan igilikter. Jaratqan iemiz Elbasymyz ben jurtymyzdy aman, elimizdi tynysh qylsyn, táýelsizdigimizdiń tuǵyry biik bop, álemdegi órkenietti elderdiń qataryna qosylýǵa násip etsin!
Ábdihamit qajy SMAILOV, zeinetker ustaz.
Túlkibas aýdany.
