QR Tuńǵysh Prezidenti – Elbasy Nursultan Nazarbaev Joǵarǵy sot tóraǵasy Jaqyp Asanovpen kezdesti. Bul týraly "Ult aqparat" Elbasynyń baspasóz qyzmetine silteme jasap habarlaidy.
Kezdesý barysynda sot júiesinde reformalardy iske asyrý aiasynda sharalardy atqarý barysy talqylandy.
Qazaqstannyń Tuńǵysh Prezidenti memlekettik basqarý júiesinde sottar erekshe orynda ekenin aita kele, halyqtyń sottarǵa senimin ary qarai arttyrý boiynsha jumystardyń mańyzdylyǵyn atap ótti.
«Kún tártibinde azamattar quqyqtaryn qorǵaý men sot júiesine halyqtyń senimin arttyrý taqyryptary únemi ózekti bolyp qalady. Bul baǵytta eleýli jumystar atqaryldy. Osy salany damytý turǵysynda «100 naqty qadam» Ult josparynda airyqsha kóńil bólingen. Belgilengen maqsattar oryndalýda, kórsetkishter jaman emes. Sottarǵa degen senim artyp keledi», - dedi Elbasy.
Óz kezeginde J. Asanov Nursultan Nazarbaevqa sýdialardy attestatsiialaýdan ótkizý nátijeleri jaiynda, sot aktileri sapasyn arttyrý men sýdialar júktemesin tómendetý boiynsha qabyldanǵan sharalar týraly aityp berdi.
«Jańa ádisteme boiynsha sýdialardy attestaýdy júrgize bastadyq. Biyl attestatsiiaǵa qatysqan 377 sýdianyń ishinde 11 paiyzy odan óte almady. Jyl sońyna deiin taǵy 260 sýdia attestatsiiadan ótedi. Osy arqyly, 2021 jyly sýdialardyń 84 paiyzy tekserispen qamtylady», - dedi Joǵarǵy sot tóraǵasy.
Osy oraida, Elbasy sot júiesiniń tiimdiligin arttyrý kóptegen shetel memleketteri úshin ózekti másele ekenine nazar aýdardy.
«Sottarǵa degen qatynas ózgerýde. Alaida sizderge áli de aýqymdy jumystardy iske asyrý kerek. Bul problemamen tek biz ǵana ainalysyp jatqan joqpyz, sonymen qatar ózge de memleketter osy salaǵa erekshe mán berip otyr», - dedi Tuńǵysh Prezident.
