El Prezidenti Nursultan Nazarbaev Taldyqorǵanǵa keldi. Maqsaty – eldiń jai-kúiin kórý, memlekettik baǵdarlamalardyń oryn-dalý barysyn baǵamdaý.
Elbasy oblys ortalyǵyndaǵy saparyn Kórme keshenin aralaýdan bastady. Onda kásipkerlermen kezdesti. Oblystyq kásipkerler palatasynyń direktory Nariman Ábilshaiyqov mekemeniń sońǵy bes jylda atqarǵan jumysyna toqtalyp, nátijesin aitty. Óńirde 100 myńnan asa shaǵyn jáne orta kásip sýbektisi bar. «Atameken» ulttyq kásipkerler palatasyna kelip túsken ótinishterdiń 71 paiyzy biznestiń paidasyna sheshilgen. Munda memlekettik baǵdarlamalardy iske asyrýǵa qoldaý bildirý, aýylsharýashylyq kooperativterin qurý, jobalardy qarjylandyrý júzege asyrylady. «Bastaý» kásipkerlikke beiimdeý mektebi ótken jyly 7 aýdanda 1312 adamdy oqytqan. Oǵan barlyǵy 1,1 mlrd. teńge bólingen. Nariman Ábilshaiyqovtyń aitýynsha, biyl atalmysh oqytý baǵdarlamasy 19 aýdanda júzege asyrylyp, oǵan 3361 adam qatystyrylmaqshy.
Oblys ákimi Amandyq Batalov oblystyń ekonomikalyq damý, aýylsharýashylyǵyn qoldaý barysynda kórsetkishterine toqtaldy. Aýylsharýashylyǵy boiynsha jalpy óndirilgen ónim kólemi 2017 jyly 647,6 mlrd. teńgeni qurasa, 2018 jyly 704,9 mlrd. teńgege jetedi degen boljam bar. Salaǵa investitsiia tartý da jyl sanap ósip keledi. Oblys basshysynyń aitýynsha, ótken jyly tartylǵan investitsiia mólsheri 42,7 mlrd. teńgeni qurasa, 2018-de 53,9 mlrd.-qa jetip otyr. Sóz arasynda el Prezidenti Nursultan Nazarbaev aýylsharýashylyq ónimderin qaita óńdeý barysynda qandai sharýalardyń atqarylyp jatqanyn surady. Óńir basshysy Amandyq Ǵabbasuly qaita óńdeý kásiporyndary týraly, olardyń ónimderiniń suranysty óteýdegi shama-sharqyn jan-jaqty aityp ótti. Sońǵy jyldary et-jún ónimderin óńdeýge barynsha kóńil bólinip kele jatqanyn sóz etti. Memleket basshysy bes áleýmettik bastamaǵa erekshe den qoiýdy tapsyrdy. Oblystyq ishki saiasat basqarmasynyń basshysy Rýstam Alpysbaev virtýaldi kórsetilim boiynsha oblystyń mádeni oshaqtaryna saiahat jasady. Murajailar, ondaǵy jádigerler ekran arqyly kórsetildi. Memleket basshysy Shoqan Ýálihanovtyń memorialdy murajaiy jaily surady. Rýstam Áliuly atalmysh mádeni oshaqty beinekórsetilim arqyly kóz aldyna keltirip, jádigerlerimen tanystyrdy. Elbasy budan keiin kásipkerler keńsesiniń, kásipkerlerge qyzmet kórsetý ortalyǵynyń jáne biznes inkýbatordyń jumysymen tanysty.
Nursultan Ábishuly kelesi kezekte Saltanat saraiyna bas suqty. Onda neke qiiý jáne jiyn ótkizetin zaldy aralap kórdi. Jańa da eńseli saraida Elbasy jýrnalisterge suhbat berdi.
– Oblysta atqarylyp jatqan jumystarǵa oń baǵa beremin. Oblys ákimi Amandyq Batalov meniń bergen tapsyrmalarymnyń barlyǵyn oryndady. Sońǵy 3 jylda aimaqta 3 mln. sharshy metr baspana qoldanysqa berilgen.
Oblysta buryn qant qyzylshasy, júgeri ósiriletin. Osylardy qalpyna keltir dep tapsyrma bergen edim. Búginde qant qyzylshasynyń alqaby jyl sanap keńeiip keledi. Tátti túbirdi qaita óńdeýden ótkizetin kásiporyndar da iske qosyldy. Endi júgerini qolǵa alý kerek. Soia, arpa ósirý kerek. Bular osy jaqtyń tól daqyly. Iaǵni, kúnkóris kózi. Halyqtyń úirengen kásibimen shuǵyldanýyna jaǵdai jasaǵan durys. Alma baqtarynyń alqaby keńeiip keledi eken. Alakólge barǵan saparymda týrizm men kásipkerliktiń qanat jaiyp kele jatqanyna kýá boldym. Aqshi aýylynyń týrist qabyldaý múmkinshiligi joǵary. Almaty – Taldyqorǵan tasjoly jasaldy. Endi sondai jol Alakól aýdany arqyly Shyǵys Qazaqstan oblysyna tartylady. Almaty oblysy shekara mańynda ornalasqan. Sondyqtan eki aýdandy qaita qurdyq. Ol aýdandar turǵyndarynyń qýanyp jatqanyn bilemin. Quttyqtaimyn. Kóshken el qaityp kelýi úshin óndirisin damytyp, jumys beretin jaǵdai jasaý kerek.
Gazdandyrý qarqyn alyp keledi. Búgingi tańda gaz jelisi kóptegen eldi mekenderge taratylǵan. Áleýmettik saladaǵy jańalyqtarǵa qýandym. Jalpy oblystyń ekonomikasyn 4 aýdan alǵa súirep keledi. Endi, artta qalǵan aýdandarǵa jaǵdai jasalýy tiis. Solardyń ekonomikasy men áleýmettik jaǵdaiyn jaqsartýǵa kúsh salyńdar. Mektepter áli de salyný kerek. Sebebi, bala sany artyp keledi. Demografiia jaqsarýda. Jalpy Almaty oblysy, onyń ishinde Taldyqorǵanda turý – baqyt. Mundai taza aýada turǵan adamdar syrqattanbaidy da. Sizder baqyttysyzdar, taldyqorǵandyqtar. El-jurtqa amandyq tileimin. Baqytty bolyńyzdar, otbastaryńyz aman bolsyn, – dedi Elbasy.
Shynymen de Taldyqorǵannyń ózgergenin kóz kórip keledi. Ekonomikalyq, áleýmettik jaǵdai jyl sanap jaqsarýda. Dala – jaiqalǵan astyq, myńǵyrǵan malymen, al qala – sáýletti ǵimarattarymen erekshelenýde.
Gúljan Tursyn
