Elbasy Túrkitildes memleketterdiń yntymaqtastyq keńesiniń beiresmi sammitine qatysty, dep habarlaidy "Ult aqparat" Elbasynyń resmi saityna silteme jasap.
Nursultan Nazarbaev sammitti barsha túrki halyqtarynyń kieli mekeni – Túrkistan qalasynda ótkizý josparlanǵanyn, alaida sońǵy ýaqytta kóptegen halyqaralyq is-sharalar epidemiologiialyq ahýalǵa bailanysty onlain rejimde ótip jatqanyn aitty. Soǵan bailanysty osy basqosýdy da beinekonferentsiia formatynda ótkizý týraly sheshim qabyldanǵanyn jetkizdi.
– Búgingi basqosýymyz «Túrkistan – Túrki áleminiń rýhani astanasy» taqyrybymen ótedi, – dedi Túrkitildes memleketterdiń yntymaqtastyq keńesiniń Qurmetti tóraǵasy.
Qazaqstannyń Tuńǵysh Prezidenti oblys ortalyǵy 2018 jyly Shymkent qalasynan Túrkistanǵa kóshirilip, sol ýaqyttan tutas ólkeniń jańa tarihy bastalǵanyna toqtaldy.
– Eki jyl ishinde qala túbegeili ózgerdi, bul jumys áli de jalǵasa beredi. Qalanyń keleshek arhitektýralyq kelbetin qalyptastyrǵanda, álbette, tarihi sabaqtastyq saqtalady, – dedi Nursultan Nazarbaev.
Elbasy is-sharaǵa qatysýshylardy koronavirýs pandemiiasyna bailanysty ahýal túzelgennen keiin Túrkistanǵa kelýge shaqyrdy.
Qazaqstannyń Tuńǵysh Prezidenti beiresmi sammit Túrki keńesine múshe baýyrlas elder arasyndaǵy dostyq pen yntymaqtastyqty odan ári nyǵaitýǵa tyń serpin beretinine senim bildirdi. Sondai-aq Nursultan Nazarbaev COVID-19 pandemiiasyna bailanysty halyqaralyq qoǵamdastyq úshin qiyn-qystaý kezeńde de túrki elderi birligin saqtap qalǵanyn atap ótti.
– Meniń usynysym boiynsha «Túrki áleminiń keleshegi – 2040» qujaty der kezinde ázirlendi dep esepteimin. Bul qujatty biyl kúzde Túrkiiada ótetin kezekti sammitte qabyldaimyz. Bakýdegi sammitte Keńesti Uiym deńgeiine kóterýdi usynǵan bolatynmyn. Sol mańyzdy usynysty qoldaǵandaryńyz úshin barshańyzǵa alǵysymdy bildiremin, – dedi Elbasy.
Túrkitildes memleketterdiń yntymaqtastyq keńesiniń Qurmetti tóraǵasy ekonomika salasynda ózara saýda men investitsiia kólemin ulǵaitýdyń áleýeti zor ekenine toqtaldy.
– Baký men Erevan arasyndaǵy beibit kelisimder Uly Jibek jolyn qaita túletip, Kaspii teńiziniń rólin arttyrady. Bul Qytaidyń «Bir beldeý, bir jol» bastamasynyń artyqshylyqtaryn elderimizdiń tiimdi paidalanýy úshin jańa múmkindikterge jol ashady. Transkaspii halyqaralyq kólik dálizi («Turan» dálizi) Eýropa men Aziiany jalǵaityn eń qaýipsiz ári qysqa saýda jolyna ainalyp keledi, – dedi Nursultan Nazarbaev.
Sammit aiasynda túrkitildes memleketter arasyndaǵy ekonomika, kólik, kommýnikatsiia jáne mádeni-gýmanitarlyq salalardaǵy yntymaqtastyq aiasyn keńeitip, nyǵaitý jaiy talqylandy.
Sondai-aq Elbasy kúlli adamzat aldynda turǵan jańa syn-qaterlerge nazar aýdardy. Nursultan Nazarbaev túrki memleketteriniń kóshbasshylaryn qazirgi kúrdeli halyqaralyq ahýalǵa orai Vashington, Máskeý, Beijiń jáne Briýssel arasynda aýqymdy kelissózder protsesin bastaý jónindegi óziniń usynysyn qoldaýǵa shaqyrdy.
– Atalǵan tórt tarap adamzattyń bolashaǵy, halyqaralyq qaýipsizdik pen turaqtylyq úshin ózderine júktelgen erekshe jaýapkershiliktiń salmaqty ekenin tolyq sezinedi dep senemin. Túrkitildes memleketterdiń basshylary meni qoldaitynyna jáne bul másele boiynsha baiypty pikir bildiretinine senimdimin. Bizdiń ortaq kózqaras-pikirimiz alpaýyt memleketterdiń astanalaryna jetedi dep úmittenemin, – dedi Qazaqstannyń Tuńǵysh Prezidenti.
Sońynda Elbasy túrki elderiniń kóshbasshylaryn ortaq meiram Naýryzben quttyqtap, baýyrlas halyqtarǵa tynyshtyq pen igilik tiledi.
Sammitke sondai-aq Qazaqstan Prezidenti Qasym-Jomart Toqaev, Túrkiia Prezidenti Rejep Taiyp Erdoǵan, Ázerbaijan Prezidenti Ilham Áliev, Ózbekstan Prezidenti Shavkat Mirziioev, Qyrǵyzstan Prezidenti Sadyr Japarov, Túrikmenstan Prezidenti Gýrbangýly Berdimuhamedov, Majarstan Premer-ministri Viktor Orban, Túrkitildes memleketter yntymaqtastyq keńesiniń Bas hatshysy Baǵdat Ámireev qatysty.
