Shyǵys Qazaqstan oblysy Kókpekti aýdany Sháriptoǵai aýylyndaǵy «Kenjetai» sharýa qojalyǵynyń irgesi sonaý 2001 jyly qalanǵan bolatyn. Sodan beri kókónis ósirýmen ainalysyp kelgen shaǵyn ǵana otbasylyq sharýashylyq qanatyn keńge jaiyp, qazir óz aldyna aýqymdy josparlar quryp otyr. Isti bastaǵan Gúlnár Sarymsaqova búginde kásip tizginin kenje ulyna usynypty. Bul týraly «Didar» gazeti jazady.
Úsh jyl buryn memlekettik «Jumyspen qamtýdyń jol kartasy-2020» baǵdarlamasy aiasynda sharýashylyq úsh million teńge nesie alyp, jylyjai salǵan. Jylyjaidy Reseidiń Novosibir qalasynan alyp kelipti. Jańa is bolǵan soń, alǵashqyda qiyńdyqtary da kóp bolǵanyn jasyrmaidy Gúlnár apai. Úkimetten alynǵan qarajat sol zamanaýi jylyjaidyń qańqasyna ǵana ketken eken, ózge qural-jabdyqtardy alý úshin kásipkerge óz qarjysyn quiýǵa týra kelipti.
Taǵy bir úkimettik baǵdarlama arqasynda jylyjai peshi alynǵan. Memleketten kómek retinde jylyjaiǵa elektr jelisi tartylǵan. Tamshylatyp sýarý qural-jabdyǵy da memlekettik baǵdarlama aiasynda satylyp alynypty. Endigi sharýa - jylyjai ishine batareialar ornatý.
- Tapqan tabystyń qomaqty bóligi nesieni jabýǵa ketedi. Desek te, is alǵa jyljyp keledi. Aldaǵy kúzde, Alla buiyrsa, alǵash ret osy aýmaǵy 300 sotyq jylyjaidy iske qosyp, qys mezgilinde qiiar men qyzanaq ósirmekpiz. Askók, salat ta sala bastaimyz. Shamamen jylyjaidan kúnine 50 keli qiyr shyǵady. Olar óse beredi. Eger osy is dóńgelenip ketse, jer jetkilikti, taǵy jylyjai salmaq oiymyz bar, - deidi qojalyq jetekshisi Kenjetai Serikuly.
«Kenjetai» qojalyǵy búginde aýdan turǵyndaryn arzan baǵadaǵy oramjapyraq, sábiz, burysh, qyzanaq, kartop, baklajan syndy kókónispen qamtyp otyr desek artyq aitqandyq emes. Biyl alqaptan 200 qap kartop shyǵady dep kútilýde. Kóktemde, kúzde jumystarǵa jergilikti turǵyndar tartylady. Daiyn ónimdi Gúlnár Sarymsaqova ózi qysy-jazy Kókpekti aýylyndaǵy bazarda turyp satady. Qonaq úidiń ishinde shaǵyn dúkeni bar. Taýar arzan baǵamen jaqsy ótedi. Kókónistiń bári de sol aýdan ortalyǵyndaǵy jaldamaly qoimada saqtalady. Ózderine derbes jeke qoima salý da josparda bar. Tuqymdardy Almatydan ákeledi. Sýdy ózennen úsh-tórt motor arqyly soryp sýarady.
Bilimi ortasha demeseńiz, Gúlnár apaidyń biliktiligi joǵary. «Bárine ómirdiń ózi-aq úiretedi. Ózim óz betimshe oqyp-úirendim. Buryn keńes ókimeti tusynda joldasym Serik Sarymsaqov ekeýimiz qoi baqtyq. Ol ozat shopan boldy. 90-shy jyldardaǵy toqyraýda kún kórý, balalardy asyraý qamymen istemegen jumysymyz joq, kommertsiiamen de ainalystyq» deidi áńgimesinde.
Shaǵyn qojalyqtyń memleket tarapynan kórgen qamqorlyǵy az emes. Eń basty syilyǵy 2009 jyly Elbasymyz Nursultan NAZARBAEVTYŃ óz qolynan alynǵan «MTZ-80» traktory boldy.
- Bizge traktor óte qajet bolatyn. Osy traktordyń óte kóp kómegi tidi, Memleket basshysynyń qolynan alynǵandyqtan ba, ózi bir berekeli kólik boldy. Elbasymyzǵa ana retinde myń da bir raqmetimdi aitqym keledi! Sol jyly Prezident issaparmen Semei qalasyna kelip, oblystaǵy ár aýdannan bir-bir sharýashylyqqa traktorlar tabystaǵan. Tehnikanyń kiltin qolyma berip turyp, ol kisi «Osy traktormen dúkenge barsańyzda da bolady» dep qaljyńdaǵany esimde. Bir qyzyǵy, bizdiń jeńil kólik bir joly synyp qalyp, sol kezde aýdan ortalyǵyna osy traktormen barǵan kezimiz de boldy, - dep kúledi Gúlnár apai.
Gúlnár apaidyń on balasy bar, «altyn alqa» iegeri. Barlyq balasy otbasyly. Eki uly - Rahat pen Kenjetai sharýashylyqty dóńgeletip otyr. «Olar qazir sharýanyń bárin ózderi isteidi, men tek baǵyt-baǵdar berip otyramyn, aqyl-keńesimdi aitamyn», - deidi kásipker.
- Qudai qalap, osy qysta jylyjaidyń jumysy júrip ketse, ony keńeitýdi kózdep otyrmyz. Jalpy, jylyjaidyń qańqasy myqty, shynysy polikarbonattan jasalǵan, qarǵa tózimdi. Ózim Semeidiń kópbeiindi kolledjinde oqyp jatyrmyn. Osy otbasylyq biznesti ary qarai damytý - negizgi maqsatym, - deidi qojalyq jetekshisi.
Erjan Ábish
Kókpekti aýdany.
