Qazaqstan Prezidenti Shanhai yntymaqtastyq uiymyna múshe memleketterdiń qorǵanys ministrlerimen kezdesti, - dep habarlaidy "Ult aqparat" Aqordaǵa silteme jasap.
Kezdesýge Qazaqstan Respýblikasynyń Qorǵanys ministri S.Jasuzaqov, Qytai Halyq Respýblikasynyń Qorǵanys ministri Chan Vantsiýan, Resei Federatsiiasynyń Qorǵanys ministri S.Shoigý, Tájikstan Respýblikasynyń Qorǵanys ministri M.Sherali, Ózbekstan Respýblikasynyń Qorǵanys ministri K.Berdiev, Qyrǵyz Respýblikasy Bas shtabynyń bastyǵy R.Dýishenbiev, Shanhai yntymaqtastyq uiymynyń Bas hatshysy R.Alimov qatysty.
Memleket basshysy Shanhai yntymaqtastyq uiymyna múshe memleketterdiń qorǵanys ministrleri Astanada ShYU-ǵa múshe-memleketter basshylary keńesin jáne «EKSPO-2017» halyqaralyq kórmesin ótkizý qarsańynda basqosyp otyrǵanynyń mańyzdylyǵyn atap ótti.
– Mádeni, aýmaqtyq, tarihi turǵydan bir-birine jaqyn memleketterdiń ekonomikalyq yntymaqtastyq máselelerin sheshý úshin qurylǵan Shanhai yntymaqtastyq uiymy ózin eleýli óńirlik birlestik retinde kórsete bildi, – dedi Qazaqstan Prezidenti.
Nursultan Nazarbaev Shanhai hartiiasy qabyldanǵan sátten bergi 15 jyl ishinde birlesken aýqymdy jumys atqarylǵanyna nazar aýdardy.
– Shanhai yntymaqtastyq uiymyna múshe memleketter basshylary keńesiniń aldaǵy otyrysynda iri eki el – Úndistan men Pákistandy uiym músheligine qabyldaý kózdelgen. Sol arqyly ShYU jer shary turǵyndarynyń 40% -ǵa jýyǵyn biriktiredi. Eń bastysy – barlyq máselelerdi konsensýs arqyly sheshýge negizdelgen «shanhai rýhyn» saqtaý, – dedi Memleket basshysy.
Qazaqstan Prezidenti uiym qyzmetiniń ekonomikalyq mazmunyn nyǵaitý qajettigin atap ótti.
– Qazirgi ýaqytta Shanhai yntymaqtastyq uiymy jumysynyń oń qarqyny «Jańa Jibek joly» baǵdarlamasynyń damýyna bailanysty bolyp otyr. Bul baǵdarlamaǵa uiym músheleriniń barlyǵy, eń aldymen, Qytai Halyq Respýblikasynyń jaqyn kórshisi - Qazaqstan qoldaý kórsetýde, – dedi Nursultan Nazarbaev.
Sońynda Memleket basshysy qorǵanys vedomstvolarynyń qyzmeti Shanhai yntymaqtastyq uiymynyń ekonomikalyq integratsiiasynyń baǵytymen qatar júrýge tiis ekendigin atap ótti.
