Ózbekstanda Nursultan Ábishulynyń jeke qasietteri árqashan da joǵary baǵalanýda. Búgin Astanada QR Tuńǵysh Prezidenti kúnine arnalǵan halyqaralyq parlamenttik konferentsiiada Ózbekstan Olii Majlisi Zań shyǵarýshy palatasynyń spikeri Nýridjon Ismoilov osylai aitty, dep habarlaidy QazAqparat.
«Táýelsizdik jyldarynda Qazaqstandaǵy eń basty strategiialyq sheshimder Prezident Nursultan Nazarbaevtyń tikelei qatysýymen júzege asyryldy. Búginde Qazaqstandaǵy prezidenttik bilik óziniń tarihi mindetin jarqyn úlgide atqara alǵanyn senimdi aitýǵa bolady. Ózbekstanda Nursultan Ábishulynyń jeke qasietteri árqashan da joǵary baǵalanýda. Táýelsizdik jyldarynda eki el basshylyǵy arasynda meiirimdi, ashyq ári dostyq qatynastar qalyptasty. Sáikesinshe, bul baǵyttaǵy qadamdar baýyrlas halyqtardyń bailanysyna ońtaily yqpal etti», - dep toqtaldy Nýridjon Ismoilov.
Sonymen qatar, ol búgin QR Parlamenti Májilisiniń tóraǵasy Nurlan Nyǵmatýlinmen eki el parlamentteri arasyndaǵy qatynastardyń perspektivasy talqylanǵanyn, osy yntymaqtastyqty tereńdetý aiasynda tiisti memorandýmǵa qol qoiylǵanyn atap ótti. «Biz Ózbekstanda Qazaqstan Prezidentiniń «Uly dalanyń jeti qyry» atty maqalasymen tanysyp shyqtyq.
Sonymen qatar, «Rýhani jańǵyrý» baǵdarlamasy sekildi taiaýda jariialanǵan maqalada kóterilgen taqyryptar Qazaqstan halqynyń uly bolashaǵyna jol silteitin tereńnen oilastyrylǵan baǵyttardy qalyptastyrdy. Onda qamtylǵan ideialardyń mańyzdylyǵy zor. Bul eńbekter ulttyq tarihty túsiný isine mańyzdy tájiribelik úlesin qosady, sondai-aq qazaqstandyq qoǵamnyń turaqty damýyndaǵy perspektivalardy aiqyndaýǵa yqpal etedi», - dedi Nýridjon Ismoilov.
