QR Tuńǵysh Prezidenti – Elbasy qory men britandyq ǵalymdar bilim salasynda birlesken jobalardy júzege asyrýǵa nietti, dep habarlaidy "Ult aqparat" qordyń baspasóz qyzmetine silteme jasap.
QR Tuńǵysh Prezidenti-Elbasy qorynyń delegatsiiasy Ulybritaniiadaǵy QR Elshiliginiń qoldaýymen Londonda qor baǵdarlamalaryn júzege asyrý sheńberinde yntymaqtastyq boiynsha birqatar kezdesýler ótkizdi.
Britan keńesiniń, Kembridj ýniversiteti ǵylymi jáne bilim berý ortalyqtarynyń, Qazaqstan-Britan qoǵamynyń basshylyǵymen, Lordtar palatasynyń múshelerimen, sondai-aq qazaqstandyq doktorantar jáne stýdenttermen kelissóz júrgizildi.Áset Isekeshev britandyqtarǵa Nursultan Nazarbaevtyń eki jańa bastamasy týraly baiandap berdi. Birinshisi – «El úmiti», bul talantty balalar men jastardy qoldaý boiynsha jańa júie. Ekinshisi – «Qamqorlyq», múmkindigi shekteýli balalardy qoldaýǵa baǵyttalǵan bastama.
Kezdesýler aiasynda Kembridj ýniversitetimen memorandýmǵa qol qoiylyp, bilim berý baǵdarlamalary men ǵylymi zertteýlerdi júzege asyrý, sondai-aq Tuńǵysh Prezident – Elbasy qorynyń jeńimpazdary men laýreattarynyń startap-jobalaryn qoldaý týraly kelisimge qol jetkizildi. Mysaly, myqty ǵalymdarymen tanymal Kavendish ortalyǵy, robototehnika men injeneriia ortalyqtary qazaqstandyq jastarǵa praktikalyq jumystar jasaý úshin óz zerthanasyn usynýǵa ázir. Dál osy jerden 34 Nobel laýreaty shyqqan.
Sondai-aq qor delegatsiiasy erekshe qajettilikteri bar balalardy meditsinalyq jáne áleýmettik ońaltý, sondai-aq inkliýzivti bilim berý máseleleri boiynsha kezdesýler ótkizdi.
Taǵy bir basqosý «Chatham House» taldaý ortalyǵynyń qabyrǵasynda uiymdastyryldy. Ol Pensilvaniia ýniversitetiniń jahandyq ondyǵyna kiretin (Global Go To Think Tank Index Report) óte bedeldi «mi ortalyqtarynyń» biri. Taraptar «Chatham House» jáne Tuńǵysh Prezident qory janyndaǵy Halyqaralyq ekonomika jáne saiasat institýtymen (HESI) yntymaqtastyq ornatýdyń áleýetin talqylady.
Aita ketý kerek, Tuńǵysh Prezident – Elbasy qory halyqaralyq áriptestikti damyta otyryp, sonyń ishinde ǵylymi-zertteý qyzmetimen ainalysý máselelerine erekshe kóńil bóledi. 2018 jyldan beri IýNISEF, Ispaniia Úkimeti janyndaǵy Aziia Úii, Korea Foundation, Japoniianyń Goi beibitshilik qory, German akademiialyq almasýlar qyzmeti siiaqty uiymdarmen yntymaqtastyq týraly memorandýmdar jasaldy.
