Qazaqstannyń Tuńǵysh Prezidenti Nursultan Nazarbaev otstavkaǵa ketkennen keiin nemen ainalysyp júrgenin aitty, dep habarlaidy Sputnik Qazaqstan.
"Jalpy saiasatkerdiń otstavkaǵa ketkennen keiin nemen ainalysatyny mańyzdy emes dep sanaimyn. Saiasatkerler keledi, ketedi, al halyq pen el qalady. Budan góri elimizdiń odan ári qalai damityny jáne aldymyzda qandai ózgerister kútip turǵany mańyzdyraq", - dedi Nazarbaev saiasattanýshy Daniiar Áshimbaevqa bergen suhbatynda.
Ol el basqarǵan jyldary barlyq kórshimen, batys áleminiń elderimen senimge negizdelgen qarym-qatynas ornaǵanyn atap ótti.
Qazaqstandy halyqaralyq saiasi arenada qurmetteidi. Qazaqstandyqtar shetelge demalýǵa nemese iskerlik saparǵa emin-erkin shyǵady. Olarǵa árdaiym qurmetpen qaraidy. Qazaqstandyqtar shetelden jumys izdemeidi, dep atap ótti Elbasy.
"Meniń otstavkamnan keiin kezinde birge istegen kóptegen memlekettiń lideri maǵan habarlasyp, óz elderine qonaqqa shaqyrdy. Men olardyń bárine rizamyn. Keibirimen áli kúnge deiin bailanysymyz úzilgen joq", - deidi ol.
Nazarbaev Eýraziialyq ekonomikalyq odaq, Túrki memleketteri uiymynyń qurmetti tóraǵasy ekenin eske saldy. Ózi qurǵan qordyń jumysyna da kóńil bólý qajet ekenin aitty. Sondai-aq jahandyq iadrolyq qaýipsizdik máseleleri de nazardan tys qalmaǵanyn atap ótti.
"Buǵan qosa óz ómirim men qyzmetim jaily esteliktermen jumys istep jatyrmyn. Búginde meniń oiym da, tilegim de – Qazaqstannyń turaqtylyǵy men gúldenýi jaily. Bizdiń urpaǵymyz bizden de kóp is tyndyrǵanyn qalaimyn. Olarǵa shyn júrekten bul iste tabys tileimin", - dep túiindedi Nazarbaev.
