Qazaqstannyń Tuńǵysh Prezidenti Nur-Sultan qalasynyń ákimi Altai Kólginovty qabyldady, dep habarlaidy Qazaqstan Respýblikasynyń Tuńǵysh Prezidenti - Elbasynyń baspasóz qyzmeti.
Kezdesýde Nursultan Nazarbaev Elordanyń ákimine bas qalamyzdy odan ári damytý úshin zor jaýapkershilik júktelgenin atap ótti.
«Kez kelgen memlekettiń astanasy el jáne úkimet basshylyǵynyń jiti nazarynda bolady. Elorda ákimine zor jaýapkershilik júkteledi. Elimizdiń qonaqtary, eń aldymen, Qazaqstannyń astanasyna keledi. Bas qalanyń damý deńgeiine qarap, jalpy memlekettiń damý barysyn baǵalaýǵa bolady» dedi Nursultan Nazarbaev.
Qazaqstannyń Tuńǵysh Prezidenti Elordanyń jańa ákiminiń júktelgen mindetterdi júzege asyrý úshin iskerligi men tájiribesi jetkilikti ekenin atap ótti.
«El basshylyǵy jáne Úkimet Sizdiń jumysyńyzǵa qoldaý kórsetedi. Kóp jumys atqarylýǵa tiis. Elorda turǵyndary tarapynan qala basshylyǵyna árdaiym joǵary talaptar qoiylady», - dedi Elbasy.
Altai Kólginov bas qalamyzdyń áleýmettik-ekonomikalyq damý kórsetkishterin jaqsartý úshin atqarylatyn jumys týraly aitty.
«Qazirgi ýaqytta qalany damytý úshin qabyldanǵan baǵdarlamalar júzege asyrylýda. Ósim deńgeiin odan ári qamtamasyz etý maqsatymen berilgen barlyq tapsyrmalar oryndalyp jatyr. Ekonomikalyq kórsetkishter jaqsy. Shaǵyn jáne orta biznes, sondai-aq óndiris kólemi artyp keledi» dedi elorda ákimi.
