Qyzylordalyq balýan, Ásker barysy Elaman Erǵaliev qazaq kúresinen jetinshi respýblikalyq «Qazaqstan Barysy» týrniriniń jeńimpazy atandy, dep habarlaidy Baq.kz.
Almaty oblysynyń balýany, tuńǵysh «Qazaqstan Barysy» Ulan Rysqul kúmis belbeýdi ielendi. Al úshinshi oryn shyǵysqazaqstandyq Aibek Nuǵymarovqa buiyrdy.
Astana qalasyndaǵy «Barys arena» saraiynda bastalǵan dodaǵa elimizdiń naǵyz «sen tur, men ataiyn» saiypqyrandary qatysty.
Buǵan deiin jarystyń úsh kezeńi ótken bolatyn: aýyldyq, aýdandyq, oblystyq. Sońǵy finaldyq kezeńde 34 palýan óner kórsetti.
EKSPO-2017 kórmesi aiasynda ótken básekeniń chempiony 25 million, al onyń bapkeri 3,5 million teńge alady. Sondai-aq arnaiy belbeý men «Taituiaq» tabys etiledi. Ekinshi orynǵa 5,5 million, úshinshi orynǵa 1 million 800 myń teńge beriledi.
«Qazaqstan» ulttyq arnasy men «Qazsport» telearnasy básekeni bastan-aiaq tikelei efirden kórsetti.
Aita keteiik, tamyz aiynda palýandar «Álem Barysy» halyqaralyq týrnirinde taǵy bir ret kúsh synasady.
