Foto: Qorǵanys ministrligi
Búgin Qazaqstanda Otan qorǵaýshy kúni atalyp ótedi. Bul – el tynyshtyǵyn kúzetip, memleket qaýipsizdigin qamtamasyz etip júrgen sarbazdar men sardarlarǵa qurmet kórsetiletin erekshe mereke, dep habarlaidy Ult.kz.
1992 jylǵy 7 mamyrda Qazaqstan Respýblikasynyń Tuńǵysh Prezidenti Qarýly kúshterdi qurý týraly №745 Jarlyqqa qol qoidy. Osy tarihi qujat táýelsiz Qazaqstan armiiasynyń negizin qalap, ulttyq qaýipsizdik júiesin nyǵaitýǵa jol ashty. Sodan beri 7 mamyr – el qorǵanysyn kúsheitý jolynda qyzmet etip júrgen áskeri qyzmetshilerdiń kásibi merekesine ainaldy.
Búginde Qazaqstan Qarýly kúshteri zamanaýi talaptarǵa sai damyp keledi. Ásker qurylymyna qurlyq áskerleri, áýe qorǵanysy kúshteri men áskeri-teńiz kúshteri kiredi. El armiiasynda er azamattarmen qatar, áskeri antqa adal názik jandylar da tabysty qyzmet atqaryp júr. Olardyń arasynda ofitserlik shen ielengen kásibi mamandar az emes. Sondyqtan bul kún – áskeri saladaǵy qyz-kelinshekterge de ortaq mereke.
2012 jyldan bastap 7 mamyr memlekettik mereke retinde belgilenip, demalys kúni bolyp jariialandy. Osy kún qarsańynda úzdik áskeri qyzmetshilerge ataqtar berilip, marapattar tabystaý dástúrge ainaldy.
Otan qorǵaýshy kúni qarsańynda Aqordada saltanatty is-shara ótti. Memleket basshysy – Qazaqstan Qarýly Kúshteriniń Joǵarǵy Bas Qolbasshysy Qasym-Jomart Toqaev sarbazdar men ofitserlerdi merekemen quttyqtap, el qorǵany bolýdyń zor jaýapkershilik ekenin atap ótti.
Prezident óz sózinde qazaq halqynyń ejelden erlik pen batyrlyqty tý etken halyq ekenin aityp, búgingi býynǵa júktelgen mindettiń de salmaǵy aýyr ekenin jetkizdi. Sondai-aq memleket armiiany nyǵaitý, qorǵanys qabiletin kúsheitý jáne áskeri qyzmettiń bedelin arttyrý baǵytyndaǵy jumystardy jalǵastyra beretinin málimdedi.
Aita keteiik, Astanada merekege orai áskeri qyzmetti nasihattaityn jáne patriottyq rýhty dáripteitin birqatar is-shara uiymdastyrylady.
