Búgin, 3 qyrkúiekte saǵat 9:00-degi jaǵdai boiynsha 93504 respondent onlain sanaqtan ótti. Olardyń 83188-i sanaq.gov.kz saitynda, 8639 Egov portalyndaǵy sait siltemesin paidalana otyryp jaýap berse, 1677 adam sanaqqa Aitu qosymshasy arqyly qatysty, dep habarlaidy QazAqparat Ulttyq statistika biýrosynyń baspasóz qyzmetine silteme jasap.
Alǵashqy eki kúnniń qorytyndysymen Pavlodar oblysy alda kele jatyr. Aimaqta 16075 adam sanaqtan ótken. Odan keiingi orynda Nur-Sultan qalasy tur. Elordalyqtardyń 15509-y sanaq saýaldaryna jaýap bergen. Bul kórsetkish boiynsha ázirge sońǵy eki oryn Mańǵystaý jáne Atyraý oblystarynyń enshisinde. Bul óńirlerde sáikesinshe 1406 jáne 1230 adam sanaqtan ótipti.
Sanaq paraqtaryndaǵy keibir saýaldarǵa qatysty turǵyndar tarapynan syn aitylǵan edi. Máselen, «Turǵyn úilerdiń (turǵyn ǵimarattardyń) syrtqy qabyrǵalarynyń materialdaryn kórsetińiz» degen saýal ne úshin qoiylǵany týraly suraq kóterildi. Aita keterligi, buǵan qatysty 11 túrli jaýap nusqasy qarastyrylǵan. Budan bólek saýaldardyń arasynda úidiń infraqurylymmen qamtylý deńgeiin anyqtaýǵa baǵyttalǵandary da bar. Bul saýaldardyń jaýaby arqyly ár eldi meken, tutas memlekettegi turǵyn úi qorynyń jai-kúii jan-jaqty saraptalatyn bolady.
Taǵy bir talqyǵa túsken suraqtardyń biri – «Siz qansha tiri bala týdyńyz?». Sonymen qatar nelikten suraqqa áielder 15 jastan bastap jaýap berýi kerek degen pikir aitylýda.
Aita keterligi, Halyq sanaǵy biyl 61 memlekette ótedi. Al BUU jariialaǵan raýndqa sáikes, 2020 jylǵa meiilinshe jaqyn merzimde barlyq memleketterde ótpek. Máselen bizdiń elde 16 jastan bastap turmys qurýǵa múmkindik beriledi. Ózge memleketterde bul kórsetkish tómen bolýy múmkin. Sondyqtan halyqaralyq deńgeide málimetterdi birizdendirý maqsatynda osy jas kórsetkishi belgilengen. Al tiri týǵan balalar jónindegi saýalǵa keler bolsaq, bul saýal Eýropalyq statistikter konferentsiiasynyń usynysy boiynsha qosymsha kórsetkishterdi anyqtaý úshin qosyldy. Budan bólek, saýalnama qorytyndysy boiynsha náresteler ólimi kórsetkishin naqtylaý júrgizilmek. Bul jerde naqty sanaq júrgizilgen ýaqyttaǵy eldiń demografiialyq bet-beinesi kórsetiledi.
Halyqaralyq uiymdardyń keńesimen qosylǵan saýaldardyń ishinde azamattardyń densaýlyq jaǵdaiyna qatystysy da bar. Máselen, kórý, estý, júrý jáne este saqtaý qabiletine bailanysty naqtylaýshy suraqtar engizilgen.
Balalarǵa qatysty tabysy týraly suraq qajet pe? degen saýal da kópshiliktiń nazaryna ilikti. Birinshi kezekte atap ótý kerek, kámelet jasyna tolmaǵandar úshin olardyń jaqyndary, ata-anasy jáne qamqorshylary toltyra alady. Bul jerde balanyń tabysy degen suraqta «Týǵan -týysqandardan nemese jaqyndardan (solardyń asyraýynda) basqa materialdyq kómek» degen nusqa bar. Sondai-aq, balaǵa qatysty belgilengen tólemder bar. Ol áleýmettik járdemaqy aliment bolýy múmkin. Al jumys isteýge ruqsat etilgen jastan bastap, onyń tabysyn kórsetýge bolady. Sanaqtyń eń alǵashqy kezeńinde bir adam basqa da otbasy múshelerin tańdai otyryp, ózi toltyrýyna múmkindigi bar. Osylaisha bir respondentti ǵana emes, jalpy otbasynyń tabys kórsetkishteri boiynsha da jalpylama málimet ázirlenedi.
Ulttyq statistika biýrosy azamattardyń belsendiligi úshin alǵys aita otyryp, sanaqty onlain ótýge shaqyrady. sanaq.gov.kz saity 15 qazanǵa deiin táýlik boiy qoljetimdi bolmaq. Onlain sanaqtan ótpegender 1-30 qazan aralyǵynda interviýerlerdiń saýaldaryna jaýap bere alady. Barlyq saýaldar boiynsha 1446 bailanys ortalyǵyna habarlasýǵa bolady. Qońyraý shalý tegin.
