Qazaqstan avtojoldarymen aýyr salmaqty kólikterdiń qozǵalysyna ýaqytsha shekteý engizildi, dep habarlaidy "Ult aqparat".
«Jazǵy ýaqytta aýa temperatýrasy 25 gradýstan joǵary bolǵan kezde ostik júktemesi 8 tonnadan asatyn kólik quraldarynyń qozǵalysyna ýaqytsha shekteýler jylda engiziledi.
Osylaisha, elimizdiń soltústik aimaqtarynda shekteýler 1 maýsymnan 15 tamyzǵa deiin jalǵasady. Aqmola, Aqtóbe, Shyǵys Qazaqstan, Batys Qazaqstan, Qaraǵandy (Qaraǵandy qalasy), Qostanai, Pavlodar jáne Soltústik Qazaqstan oblystarynda shekteýler saǵat 11:00 - 21:00 aralyǵynda bolady.
Almaty, Atyraý, Jambyl, Qaraǵandy (Jezqazǵan aimaǵy), Qyzylorda, Mańǵystaý jáne Túrkistan oblystarynda 1 maýsym men 31 tamyz aralyǵynda, saǵat 10:00-nan 22:00-ge deiin saqtalady», - delingen QR Indýstriia jáne infraqurylymdyq damý ministrliginiń málimetinde.
Atalǵan shekteýlerdiń qatysy joq: halyqaralyq kelisimderge sáikes júkterdiń jáne jolaýshylardyń halyqaralyq tasymalyn, tótenshe jaǵdailardy joiý jáne aldyn alý jónindegi is-sharalardy, zardap shekken adamdarǵa gýmanitarlyq kómek kórsetýdi, tez buzylatyn azyq-túlikterdi tasymaldaýdy, jolaýshylar men bagaj tasymalyn, dári-dármekterdi tasymaldaýdy júzege asyratyn, sondai-aq jol-qurylys jumystaryna tartylǵan avtokólik quraldaryna.
