Respýblika boiynsha aýyr atletika jarystarynda dopingpen ustalyp jatqan sportshylar bar. Bul týraly QR Aýyr atletika federatsiiasynyń atqarýshy direktory Aldiiar Nuralinov málim etti, dep habarlaidy QazAqparat.
«Kelesi Olimpiada oiyndaryna tolyq quramda qatysýdy josparlap otyrmyz. Tokio Olimpiadasynda biliktilik júiesi birneshe shekteýdi boljady, osyǵan orai Qazaqstan 2 sportshyny qatystyrý jóninde sheshim qabyldady. Bizdiń federatsiia dopingke qarsy bilim berý, seminar, treningterdi úzbei ótkizip keledi. Álemdik jarystarǵa jibermes buryn atletterdi dopingke qarsy tekserýden ótkizemiz, maqsat – sportshylardyń taza ekendigine taǵy bir ret kóz jetkizý. Aǵymdaǵy tártipbuzýshylyqtarǵa kelsek, el kóleminde doping erejesin buzýshylyq bar, biz atletterdi ustap jatyrmyz. Jýyrda ǵana Qostanaida aýyr atletikadan ótken jastar oiyny barysynda doping jaǵdaiy tirkeldi. Ondai sátte ár jaǵdai jeke qaralyp, tekseriledi», - dedi Aldiiar Nuralinov OKQ-de onlain ótken baspasóz máslihatynda.
Sondai-aq, federatsiia basshysy elimizde dopingpen kúres jumysy jalǵasa beretinin alǵa tartty.
«Bul baǵyttaǵy jumystardy toqtatpaimyz. Aldaǵy ýaqytta halyqaralyq baqylaýshylar keledi. Halyqaralyq testileý agenttigimen birlesip áreket etý máselesi qaralyp jatyr. Agenttik ókilderi osydan birneshe apta buryn ǵana Tokio Olimpiadasyna baratyn bizdiń aýyr atletterdi dopingke qarsy testileýden ótkizgen bolatyn. Odan bólek, sportshylarymyz Qazaq ulttyq dopingke qarsy ortalyqtyń jiti baqylaýynda», - deidi ol.
