Eýropadaǵy qaýipsizdik jáne yntymaqtastyq uiymy (EQYU) Resei biligi engizgen Covid shekteýlerine bailanysty qyrkúiekte ótetin Gosdýma sailaýyna baqylaýshylaryn jibere almaidy. Bul týraly parlamenttik assambleia men Adam quqyǵy men demokratiialyq institýttar jónindegi biýronyń (BDIPCh) ortaq málimdemesinde jazylǵan, dep habarlaidy Azattyq.
Biýro jetekshisi men parlamenttik assambleia Resei biligin qabyldanǵan sheshim týraly habardar etken.
Málimdemede biýro "sailaýdy baqylaý aýqymy men formatyn ózi anyqtaidy" dep jazylǵan. Buǵan deiin gosdýma sailaýyna 80 uzaqmerzimdi jáne 420 qysqamerzimdi baqylaýshy jiberiledi dep aitylǵan edi.
Bastapqyda biýro men parlamenttik assambleia ókilderi gosdýma sailaýyn baqylaýǵa shaqyrylǵan. Biraq artynsha ókilder sany 50-den 10-ǵa deiin qysqardy. Resei biligi mundai sheshimdi koronavirýs jaǵdaiymen túsindirdi.
"Reseidegi sailaýdy baqylai almaitynymyz óte ókinishti. Resei biliginiń indetpen bailanysty baqylaýshylar sanyn shekteý týraly talaptary ókinishke qarai, bizdi osyndai qadamǵa itermelep otyr" dedi EQYU-nyń Adam quqyǵy men demokratiialyq institýttar jónindegi biýro direktory Matteo Mekachchi.
EQYU – álemdegi sailaý protsesterin baqylaityn jetekshi uiymdardyń biri. Ol uiymǵa múshe 57 elge sarapshylaryn jiberip, sailaýdyń erkin ári ádil ótkenin-ótpegenin anyqtaidy.
Reseide Gosdýma sailaýy 19 qyrkúiekte ótedi. Shilde aiynda ortalyq sailaý komissiiasy sheteldikterdiń jumysy indetke bailanysty anyqtalady dep eskertken. Keibir quqyq qorǵaýshylardyń pikirinshe, sailaý qarsańynda Kremldiń oppozitsiia jetekshileri, úkimettik emes uiymdar men táýelsiz BAQ-ty qýdalaýy kúsheigen.
