EQYU Parlamenttik Assambleiasynyń tóraǵasy Margaret Sederfelttiń bastamasymen uiymnyń Aýǵanstandaǵy jaǵdaiǵa arnalǵan otyrysy ótti, dep habarlaidy "Ult aqparat" Senattyń baspasóz qyzmetine silteme jasap.
Onlain rejimde uiymdastyrylǵan is-sharaǵa Tájikstan, Túrikmenstan jáne Ózbekstan parlamentteri delegatsiialarynyń jetekshileri, EQYU-nyń osy elderdegi keńseleriniń, sondai-aq, EQYU qaqtyǵystardyń aldyn alý jónindegi ortalyǵynyń ókilderi qatysty.
Kezdesýge qatysýshylar Aýǵanstandaǵy qazirgi jaǵdaiǵa nazar aýdaryp, soǵan bailanysty Ortalyq Aziia elderi úshin óńir qaýipsizdigine tónýi múmkin qaterdi talqylady.
Pikir almasý barysynda EQYU PA tóraǵasynyń orynbasary, QR Parlamenti Senatynyń vitse-spikeri Asqar Shákirov Assambleianyń qoldanystaǵy mandaty aiasynda aýǵan halqynyń senimin qalpyna keltirý sharalaryn ázirleý máselesine toqtaldy. Qazirgi tańda halyqaralyq koalitsiia kúshteriniń osy elden shyǵarylýyna bailanysty Aýǵanstan azamattarynda erteńgi kúnge degen senimsizdik basym ekeni belgili.
Ortalyq Aziia elderi Aýǵanstannan bosqyndardyń jappai kóshýi kezinde aimaqtaǵy jaǵdaidyń turaqsyzdanýyna jáne radikaldy aǵymdar ókilderiniń óńirge shoǵyrlaný múmkindigine alańdaýshylyq bildirdi.
Vitse-spiker Aýǵan jerindegi jaǵdaidy turaqtandyrý jumystaryna Qazaqstannyń qatysyp jatqanyn atap ótti. Ol Qazaqstan Prezidenti Qasym-Jomart Toqaevtyń sheshimine sáikes Almatyǵa BUU-nyń Aýǵanstanǵa kómek kórsetý jónindegi missiiasynyń ýaqytsha keńsesi kóshirilgenin tilge tiek etti. Qazirgi tańda Missiia qyzmetkerlerine jumys isteýge jáne turýǵa qajetti jaǵdai jasalǵan.
Otyrys sońynda Parlamentter ókilderi Aýǵanstandaǵy ahýalǵa onyń EQYU aimaǵyndaǵy qaýipsizdikke yqpaly turǵysynan turaqty monitoring júrgizý kerektigi týraly usynystar aitty. Sondai-aq, bul máseleni Parlamenttik Assambleianyń aldaǵy is-sharalarynyń kún tártibine engizý qajettigi de sóz boldy.
