Astanadaǵy EKSPO qalashyǵy aýmaǵynda elimizdegi biregei ashyq muz aidyny ashyldy, dep habarlaidy «Ult aqparat».
Onyń basty ereksheligi - arnaiy tońazytqysh jabdyǵynyń kómegimen +10 gradýs jáne odan tómen temperatýrada da jumys istei alatyndyǵynda. Bul, sózsiz, konkimen syrǵanaý maýsymyn kelesi jyldyń sáýir aiyna deiin uzartýǵa múmkindik beredi.
«Astananyń tórinde úlken muz aidynynyń ashylǵanyna óte qýanyshtymyn. Men inimmen keldim. Birneshe jyldan beri konki tebýmen ainalysamyn. Kóńil-kúi jaqsy jáne aýa raiy keremet», – deidi, alǵashqy qonaqtardyń biri - Torǵyn atty stýdent qyz.
Bas shahardaǵy eń úlken ashyq muz aidynynyń jalpy aýmaǵy 4 000 sharshy metrdi quraidy. Sonymen qatar, ol bir mezgilde 700-ge jýyq adam qabyldai alady.
Al, aidynnyń sapasy joǵary bolýy úshin arnaiy muz quiatyn mashinalar qoldanylmaq.
«MegaIce» kompaniiasy direktorynyń aitýynsha, atalǵan jobaǵa biýdjet aqshasy jumsalmaǵan. Bul - kompaniianyń óz qarajaty.
«Bul muz aidyny EKSPO aýmaǵyna arnaiy jobalanǵan. Kompaniia jobany memlekettiń qatysýynsyz, óz qarajaty esebinen júzege asyrdy. Muz aidyny Kórme kezinde týristerdiń qyzyǵýshylyǵyn týdyrǵan qos «jalyndy» sýburqaqtyń arasynda ornalasqan. Onyń pishini Nur Álem pavilonyna baǵyttalǵan jebege uqsas. Al, qaq ortasynda jaryq boiaýlarynyń kómegimen EKSPO logotipi beinelengen. Sondai-aq, muz aidynyna keshki ýaqytta jarqyraityn jaryq-joldary tóselgen», - dedi Erlan Úmbetov óz sózinde.
Budan bólek, «MegaIce» kompaniiasynyń enshisinde ártúrli ólshemdegi 1000 jup jańa konki bar. Olar barlyq kelýshilerge jalǵa beriledi. Konkimen syrǵanaýdy jańa úirenip jatqan adamdarǵa jattyǵý qurylǵylary usynylady. Muz ústinde tártip pen qaýipsizdikke jaýapty mamandar men nusqaýshylar bolady. Qonaqtar úshin jeke zattardy saqtaý oryndary, kiiný bólmeleri, sondai-aq ystyq tamaq berý oryndary qarastyrylǵan.
«Jańa muz aidyny qala turǵyndary men qonaqtarynyń súiikti demalys ornyna ainalatyny anyq. Bul, óz kezeginde, demalys ýaqytyn taza aýada belsendi ótkizýge múmkindik beredi», - dep sózin qorytyndylady «MegaIce» kompaniiasynyń direktory Erlan Úmbetov.
Qosymsha aqparat: Kirý biletiniń quny - 1000 teńge. Oqýshylar men zeinetkerler úshin 50% jeńildik qarastyrylǵan. 6 jasqa deiingi balalar úshin kirý tegin. Biletterdi EXPO-2017 resmi saitynda (www.expo2017astana.com), sondai-aq EKSPO aýmaǵynda ornalasqan kassalardan satyp alýǵa bolady.
Muz aidyny jumys kúnderi saǵat 12.00-den 23.00-ge deiin (tehnikalyq úzilis: 16: 00-den 18: 00-ge deiin), demalys jáne mereke kúnderi saǵat 10.00-den 23.00-ge deiin (tehnikalyq úzilis 13.00-den 14.00-ge deiin, saǵat 17.00-den 18.00-ge deiin) ashyq.
