Búgin Premer-Ministr Baqytjan Saǵyntaevtyń tóraǵalyǵymen ótken QR Úkimeti otyrysy barysynda «Ekspo-2017» kórmesinde kórsetilgen tehnologiialardy engizý máseleleri qaraldy. Júrgizilip jatqan jumys týraly energetika ministri Qanat Bozymbaev pen bilim jáne ǵylym ministri Erlan Saǵadiev baiandady, dep habarlaidy "Ult aqparat" Úkimet basshysynyń baspasóz qyzmetine silteme jasap.
Qanat Bozymbaev aityp ótkendei, energetika ministrliginiń saraptamalyq jumys toby tórt baǵyt boiynsha «Ekspo» kórmesiniń sheteldik pavilondarynda kórsetilgen 105 sheteldik jáne 28 otandyq tehnologiiany iriktedi:
● munai jáne gaz — 27 tehnologiia,
● kómir ónerkásibi — 7 tehnologiia,
● elektr energetikasy, energiiany únemdeý jáne JEK — 63 tehnologiia,
● ekologiia (qaldyqtardy basqarý, sý tazalaý, aýa sapasyn baqylaý) — 36 tehnologiia.
Bul tizim ulttyq jáne jekemenshik kompaniialarǵa, sondai-aq ákimdikterge tehnologiialardy qarastyrý jáne irikteý úshin jiberildi. Budan ózge, barynsha aqparattandyrý maqsatynda tehnologiialar tizimi bailanys aqparattarymen qosa Energetika ministrliginiń saitynda jariialandy.
«Ákimdikter qazirgi ýaqytta engizý úshin 40 tehnologiiany iriktep aldy, onyń tórteýi 2018 jyly engiziledi. Ulttyq kompaniialar engizý maqsatynda 15 tehnologiiany iriktep aldy, onyń ekeýi 2018 jyly engiziledi», — dep atap ótti Qanat Bozymbaev.
Energiiany únemdeý, sýdy tazartý, «aqyldy jeliler» jáne kásiporyndarda JEK paidalaný boiynsha tehnologiialar tańdalǵan.
Munai jáne gaz salasynda Resei, AQSh, Qytai jáne Finliandiiadan 7 tehnologiia anyqtaldy. Mysalǵa, Qostanai oblysy ákimdigi «SGK-510 gaz taldaý qondyrǵysy» nemis tehnologiiasyn 2018 jyly engizýdi josparlaýda. Osy tehnologiiany engizý arqyly gazdy tutyný azaiady, bul jylyna 40 mln teńgege jýyq únemdeýge múmkindik beredi.
«Elektr energetikasy» baǵyty boiynsha 35 tehnologiia anyqtaldy, onyń ishinde ákimdikter 26 tehnologiiany tańdady. Solardyń biri — «Uialy telefondarǵa arnalǵan tegin qýattaýdyń avtonomdyq stantsiialary» qytailyq tehnologiiasy, ol 2018 jyly Soltústik Qazaqstan oblysynda engiziledi. Bul tehnologiia tutynylǵan elektr energiiasyna jumsalatyn shyǵyndardy jáne qorshaǵan ortaǵa júktemeni azaitýǵa múmkindik beredi. Qazirgi ýaqytta ákimdik qytailyq Shenzhen kompaniiasymen jabdyqtardy jetkizý týraly kelisimge keldi.
«Ekologiia» baǵyty boiynsha ákimdikter turmystyq jáne ónerkásiptik sarqyndy sýlardy tazartý, aýa sapasyn baqylaý jáne qaldyqtardy basqarý salasynda 10 tehnologiiany tańdady.
Energetika ministriniń aitýynsha, tehnologiialar tizimi áli naqtylanady.
Bilim ministri Erlan Saǵadiev óz kezeginde «Ekspo-2017» halyqaralyq kórmesi qazaqstandyq ǵylymda, tehnologiialar transferti men bilim berýdi damytýda jańa ideialardyń týyndaýyna qýatty serpin bergenin atap ótti.
«Kórmeni 55 ýniversitet jáne ministrliktiń ǴZI ókilderi aralady. Qatysýshy elderdiń ókilderimen 100-den astam kezdesý men kelissózder júrgizildi. Yntymaqtastyq ornatý týraly 9 memorandýmǵa qol qoiyldy. Ýniversitetter ekijaqty yntymaqtastyq týraly 20-dan astam kelisimge qol jetkizdi», — dep baiandady Erlan Saǵadiev.
ǴZI men ýniversitetter ǵalymdarynyń sheteldik áriptestermen, ýniversitetter jáne kompaniialarmen halyqaralyq bailanysy edáýir jandandy. JOO-lar men vedomstvoǵa qarasty ǴZI 25 ǵylymi-zertteý jobalary men baǵdarlamalaryn daiarlaý men iske asyrýdy júrgizip jatyr.
«12 iri ǵylymi joba men baǵdarlamalarda jáne 89 granttyq jobalarda ǵylymi-tehnikalyq baǵdarlamalardy iske asyrý kezinde negizgi taqyryp kózi “Ekspo-2017” ideialary bolyp tabylady», — dedi Erlan Saǵadiev.
Máseleni qaraý qorytyndysy boiynsha Premer-Ministr Baqytjan Saǵyntaev oblystardyń ákimdikterine jańa tehnologiialardy engizý kezeńine kóshý boiynsha jumysty jalǵastyrýdy tapsyrdy.
