«Ekspo-2017» halyqaralyq kórmesi aiasynda ótkizilgen mádeni sharalardyń qorytyndysy týraly búgin QR Úkimetiniń baspasóz ortalyǵyndaǵy baspasóz konferentsiiasynda mádeniet jáne sport vitse-ministri Aqtoty Raiymqulova men «Astana Opera» teatry direktorynyń birinshi orynbasary Tóleýbek Álpiev aityp berdi, dep habarlaidy "Ult aqparat" Úkimet basshysynyń baspasóz qyzmetine silteme jasap.
A. Raiymqulovanyń aitýynsha, Memleket basshysynyń tapsyrmasymen Mádeniet jáne sport ministrligi «Ekspo-2017» halyqaralyq mamandandyrylǵan kórmesiniń mádeni-oiyn-saýyq jáne sport sharalarynyń keshendi baǵdarlamasyn ázirledi ári ol sátti iske asyryldy deýge bolady.
«Mádeniet jáne sport ministrligi «Astana Ekspo-2017»-men jáne elorda ákimdigimen birlesip, Astanada joǵary deńgeide túrli janrdaǵy 8 myńnan astam (8 460) mádeni jáne sport sharalaryn uiymdastyryp, ótkizdi. Oǵan jetekshi qazaqstandyq jáne sheteldik shyǵarmashylyq uiymdary, mádeniet jáne sport sheberleri, sondai-aq, Qazaqstannyń daryndy jastary qatysty», — dedi A. Raiymqulova.
Sonymen qatar kórme aiasynda elimizdiń aimaqtarynda da 31 myńnan astam shara ótkizildi, elordamyzda barlyq oblystardyń jáne Almaty men Astana qalalarynyń Mádeniet kúnderi uiymdastyryldy.
QR Ulttyq mýzeii kólemdi ekspozitsiialar men mazmuny jaǵynan biregei kórmeler ótkizdi. Egipet tarapy esebinen Ejelgi Egipettiń arheologiialyq muralary qoiylǵan halyqaralyq kórme uiymdastyryldy. Islam óneri mýzeiiniń (Egipet, Kair q.) jinaqtarynan «Sultan Beibarys jáne onyń dáýiri» halyqaralyq kórmesi ótkizildi. Alǵash ret elimizde «Imperator Tsin Shihýandidiń Terrakota áskeri» mýzeiiniń halyqaralyq kórmesi ótti. Sondai-aq, Ulttyq mýzeide Memlekettik Ermitaj qorlarynan Qarý-jaraq óneriniń halyqaralyq kórmesi ashyldy. Barlyǵy Ekspo-2017 kezinde Ulttyq mýzeidi 300 myńnan astam adam aralady.
Budan ózge, mańyzdy imidjdik joba retinde qazaqstandyq jáne gollivýd juldyzdary, «Oskar», «Altyn globýs», «Sezar» syilyqtarynyń laýreattary Nikolas Keidj, Edrian Broýdi jáne Djon Malkovichtiń qatysýymen ótken «Eýraziia» HIII halyqaralyq kinofestivalin atap ótýge bolady.
«Bir sózben aitsaq, E. Broýdi, Dj. Malkovich qazirgi tańnyń ózinde belsendi bailanys ornatyp, álemge Los-Andjelestegi kórmeniń prezentatsiialarynda, «Karnegi Holl» teatrynda jáne t. b. jerlerde Qazaqstannyń san qyrly mádenietin tanystyryp júr», — dedi vitse-ministr.
«Astana Balet» teatrynyń, «Astana Opera» MOBT, «Qazaqstan» OKZ alańdarynda koreialyq trýppa Universal Ballet, AQSh-tan kelgen Bad Boys of Dance, «Astana Balet» teatrynyń, «Astana Opera» MOBT balet trýppasynyń, sondai-aq, álemdik balettiń tanymal solisteriniń qatysýymen Eurasian Dance Festival balet óneriniń halyqaralyq festivali ótti.
«Ekspo-2017»-niń mádeni baǵdarlamasy Qazaqstan halqynyń mádeniet jáne ónerdegi jetistikterin jan-jaqty ári tolyq kólemde kórsete bildi. Keshendi baǵdarlamada qazaq halqynyń tarihyn, mádenietin jáne salt-dástúrin ashyp kórsetetin sharalarǵa erekshe kóńil bólindi», — dep sózin túiindedi A. Raiymqulova.
