Foto: primeminister.kz
Eks-ministr Marat Ahmetjanov Aqmola oblysynyń ákimi boldy, dep habarlaidy "Ult aqparat".
"Memleket basshysynyń Jarlyǵymen Marat Muratuly Ahmetjanov Aqmola oblysynyń ákimi laýazymyna taǵaiyndaldy" - delingen Aqorda habarlamasynda.
Sondai-aq búgin Prezident Ákimshiliginiń Basshysy Aqmola oblysynyń jańa ákimin tanystyrdy.
"Memleket basshysy Qasym-Jomart Toqaevtyń tapsyrmasy boiynsha Prezident Ákimshiliginiń Basshysy Oljas Bektenov Aqmola oblysynyń barlyq deńgeidegi máslihattary depýtattarynyń jinalysyna qatysý úshin Kókshetaý qalasyna jumys saparymen bardy.
Kezdesý barysynda Oljas Bektenov depýtattarǵa Aqmola oblysynyń ákimi laýazymyna Marat Muratuly Ahmetjanov pen Murat Saǵatuly Balpannyń kandidatýrasyn usyný týraly Prezidenttiń hatyn oqyp berdi" - delingen habarlamada.
Ashyq daýys berýdiń nátijesinde 177 depýtat Marat Ahmetjanovtyń, 73 depýtat Murat Balpannyń kandidatýrasyn qoldap, daýys bergen. Jinalysqa barlyǵy 250 depýtat qatysqan. Daýys berý qorytyndysy boiynsha Prezident Jarlyǵymen Ahmetjanov Marat Muratuly Aqmola oblysynyń ákimi bolyp taǵaiyndaldy.
"Óńir aktivine jańa ákimdi tanystyrǵan Oljas Bektenov Marat Ahmetjanovtyń quqyq qorǵaý jáne qadaǵalaý salalarynda túrli basshylyq qyzmetterdi tiimdi atqarǵan tájiribeli basshy ekenin atap ótti.
Ol oblys basshylyǵy Prezidenttiń halyqqa Joldaýynda kórsetilgen mindetterdi iske asyrýǵa kúsh salýy qajet ekenin aitty. Aqmola oblysynyń ákimdigi óńir ekonomikasyn damytý, azamattardy sapaly aýyzsýmen qamtamasyz etý, oblys ortalyǵyndaǵy jylý energiiasynyń tapshylyǵyn joiý, meditsina salasyn damytý, turǵyndardy áleýmettik infraqurylymmen qamtamasyz etý, týristik áleýetti nyǵaitý, elorda mańyndaǵy aýmaqtardy damytý jáne basqa da mańyzdy baǵyttar boiynsha belsendi jumys isteýi kerek.
Bektenov jergilikti atqarýshy organdardyń jumysy azamattarmen tabysty bailanys ornatýǵa jáne Memleket basshysynyń tapsyrmalaryn júzege asyrýǵa negizdelýi qajet ekenine nazar aýdardy.
Kezdesý sońynda Oljas Bektenov Marat Ahmetjanovqa oblys turǵyndarynyń igiligi úshin Prezident júktegen barlyq mindetti oryndaý jolynda tabys tiledi, sondai-aq aimaqtyń burynǵy basshysy Ermek Marjyqpaevqa atqarǵan jumysy úshin alǵys aitty" - delingen habarlamada.
