Koronavirýsqa qarsy ekpeniń áseri alǵashqy úsh kúnde baiqalýy múmkin. Bul týraly oblystyq densaýlyq saqtaý basqarmasynyń shtattan tys bas epidemiology Almagúl Mantakova málim etti, dep habarlaidy QazAqparat.
Onyń aitýynsha, ekpe alǵannan keiin keibir adamnyń ózin álsiz sezinip, qyzýy kóterilýi yqtimal.
Sondai-aq ekken jer aýyryp, isinýi múmkin. Degenmen munyń bári – qalypty jaǵdai.
A.Mantakovanyń sózine qaraǵanda, oblysta koronavirýsqa qarsy kúni búginge deiin 500-dei adam egilip úlgerdi.
Aqpan aiy boiy meditsina qyzmetkerlerin egý jalǵasady. Al naýryzda oblysqa 8 myń doza vaktsina jetkiziledi dep josparlanýda. Ol kezde halyqtyń basqa toptaryn da egý bastalady.
Oral qalalyq №3 emhananyń nevrolog dárigeri Dariǵa Úmbetiiarova da ekpeden qorqýdyń qajeti joqtyǵyn, adamnyń óziniń densaýlyǵy úshin salynyp jatqandyǵyn jetkizdi.
«Men de ekpe aldym, eshqandai reaktsiia bolǵan joq. Árine, bastapqy úsh kúnde saqtaný kerek. Iaǵni sýǵa túsýge, adam kóp baratyn jerlerge barýǵa bolmaidy. Jalpy, kim-kim de karantin talabyn saqtap, oǵan qosa indetke qarsy egilse, biz odan tez qutylamyz dep oilaimyn», dedi dáriger.
