QR Densaýlyq saqtaý ministrligi Taýarlar jáne kórsetiletin qyzmetterdiń sapasy men qaýipsizdigin baqylaý komiteti tóraǵasynyń orynbasary – bas memlekettik sanitariialyq dáriger Jandarbek Bekshin ekpe jasalmaǵan balalar balabaqshalarǵa kirgizilmeitinin málim etti, dep habarlaidy QazAqparat.
«Shynynda da, mektepke deiingi uiymdarǵa bizdiń kúntizbelik josparǵa sáikes, vaktsinatsiiadan ótpegen balalar kirgizilmeidi. Bul shekteýdiń ekpege meditsinalyq turǵyda qaishylyǵy bar balalarǵa qatysy joq. Ne úshin olai ettik? Sebebi, ekpe meditsinalyq turǵyda aǵzasyna keri áser etetin balalar da bar. Iaǵni, olarǵa ekpe júrgizilmeidi», - dedi Jandarbek Bekshin OKQ-da ótken baspasóz máslihatynda tilshilerdiń suraǵyna jaýap bere otyryp.
Jandarbek Bekshin óz sózinde ujymdyq immýnitet eń joǵary qoiylýy kerektigin atap ótti.
«Balalardy qalai qorǵaimyz? Olar vaktsinatsiia júrgizgisi kelmeitin adamdardyń tutqyny boldy da qaldy. Ujymdyq immýnitet týraly sóz qozǵap otyrmyz. Eger biz halyqtyń 95 paiyzyna ekpe jasasaq, ekpe jasalmaýy tiis adamdar tobyn qorǵap qalamyz. Týǵannan immýnodefitsitpen ómir esigin ashatyn balalar bar», - dedi ol.
Onyń aitýyna qaraǵanda, balabaqshaǵa barmas buryn ata-ana ýchaskelik pediatorǵa baryp, densaýlyq pasportyn alady. Ol qujatta balanyń deni saý, vaktsinatsiialanǵany týraly málimet bolýy kerek.
«Iaǵni, balany balabaqshaǵa aparýǵa bolatyny ol qujatta jazylady. Eger ondai qorytyndy densaýlyq pasportynda bolmasa, mektepke deiingi uiym basshysynyń ony kirgizýge quqyǵy bolmaidy. Eger basshy bul talapty buzatyn bolsa, tekseris kezinde bul faktiniń baryn bilsek, bastabynda onymen, balanyń ata-anasymen de túsindirý jumystary júrgiziledi. Eger ol ary qarai da bul shekteýdi qabyldamasa, onda basshyǵa tiisti uiǵarym beriledi. Uiǵarym oryndalmasa, is sotta sheshiledi», - dedi Jandarbek Bekshin.
Eske sala ketsek, Májiliste «Halyq densaýlyǵy jáne densaýlyq saqtaý júiesi týraly» kodeks jobasynyń jańa redaktsiiasyn tanystyrý barysynda QR Densaýlyq saqtaý ministri Eljan Birtanov qujatta mektepke deiingi uiymdarǵa egilmegen balalardy kirgizýge tyiym salynatynyn jetkizgen bolatyn.
