Kásipkerlikti jańasha retteý saiasatyn engizý úshin «Smart» retteý» jobasy qolǵa alynady, dep habarlaidy QazAqparat.
Úkimet otyrysynda Ulttyq ekonomika ministri Áset Erǵaliev saladaǵy salyqtyq jeńildikter men zańnamalyq ózgerister týraly da aqparat berdi.
«2020 jylǵy 1 qańtardan bastap arnaýly salyq rejimderin qoldanatyn shaǵyn jáne mikro kásipkerlik sýbektilerin tabys salyǵynan 3 jylǵa bosatý qoldanylady. Osy jyldyń birinshi qańtarynan bastap, Qyzmet kórsetý salalarynda alynǵan tabystyń 3% mólsherlemesimen bólshek salyqtyń jańa arnaiy rejimi engizildi. Aǵymdaǵy jyldyń birinshi sáýirinen bastap, birinshi shildesine deiin zardap shekken salalarda eńbekaqy tóleý qorynan salyqtardy tóleýdi keiinge qaldyrý múmkindigi beriletin boldy», - deidi ministr.
Onyń sózinshe, «Atameken» Ulttyq kásipkerler palatasy 50 myńnan astam kásipkerlik nysanǵa saýalnama júrgizip, sonyń negizinde shaǵyn jáne orta biznesti qoldaý jónindegi jańa sharalar paketi ázirlengen.
«2021 jylǵa arnalǵan ekonomikalyq ósýdi qalpyna keltirý jónindegi ózektendirilgen keshendi jospar sheńberinde 60 astam qoldaý sharalary kózdelgen.
1. Bizneske júktemeni azaitý, onyń ishinde birqatar salyqtyq jeńildikter jáne salyqtyq ákimshilendirýdi jeńildetý.
2. Kásipkerlerdiń qarjylandyrýǵa qol jetimdiligin jeńildetý.
3. Suranystaǵy naryqtarǵa qol jetkizý. Atalǵan baǵyt Memlekettik satyp alýlarǵa jáne kvazimemlekettik sektordyń satyp alýlaryna qoljetimdilikti jeńildetýge baǵyttalǵan sharalar kózdelgen.
4. «Smart» retteý kásipkerlik salasynda jańa retteý saiasatyn engizýdi kózdeitin zańdy ázirleý men qabyldaýdy qamtityn bolady», - dedi vedomstvo basshysy.
Áset Erǵlaiev jańa ekonomikalyq jaǵdaida salany retteýdiń jańa saiasaty ázirlenip jatqanyn atap ótti.
«Bizneske júktemeni túbegeili tómendetý, ońtaily jáne tiimdi rettegish júieni qalyptastyrý maqsatynda kásipkerlik qyzmetti «taza paraqtan» retteýdiń jańa tásilderi qalyptastyrylýda. Onyń ishinde memleket pen kásipkerliktiń ózara is-qimylynyń bazalyq qaǵidattaryn jetildirý, talaptardy belgileý sharttary, retteýshilik apelliatsiia institýty, eksperimenttik quqyqtyq rejim, mindetti talaptar tizilimi, eseptilik, baqylaýdaǵy táýekel-taldaýdy avtomattandyrý, memlekettik baqylaýdy jetildirý sharalary qamtylǵan.
Búgingi tańda tiisti zań jobasy barlyq memlekettik organdarmen kelisilip, Úkimettiń qaraýyna engizildi», - dedi ministr.
