Foto: Kursiv-media
Vitse-premer – ulttyq ekonomika ministri Serik Jumanǵarin ótkizgen keńeste biylǵy 5 aidaǵy elimizdiń JIÓ ósiminiń quramdas bóligi men ekonomikaǵa qomaqty úles qosyp otyrǵan salalardyń damý serpinin arttyrý múmkindikteri talqylandy, dep habarlaidy Ult.kz.
Ónerkásip ekonomikalyq ósýdiń negizgi qozǵaýshy kúshi bolyp qala beredi: 2024 jylǵy qorytyndy boiynsha onyń JIÓ-degi úlesi 25,7%-dy qurady. 2025 jylǵy qańtar–mamyr ailarynda sala 6,4%-ǵa ósken. Degenmen, qarqyn báseńdep barady: bir ai buryn ósim 6,6%-dy quraǵan. Onyń basty sebebi – óndiristiń óskenine qaramastan óńdeý ónerkásibiniń baiaýlaýy. Ónerkásiptik óndiris indeksiniń tómendeýi úsh óńirde: Shyǵys Qazaqstan oblysy (90,4%), Ulytaý oblysy (96,2%) jáne Qostanai oblysynda (97,6%) tirkeldi.
Óńdeý josparynan artta qalý, eń aldymen, óńdeý ónerkásibiniń 40%-yn quraityn metallýrgiiamen bailanysty. Keńeste basqa segmentterdegi – mashina jasaý, tamaq, himiia jáne munai óńdeý ónerkásibindegi ósý áleýeti de qarastyryldy.
Belsendi ósý qarqyny bar taǵy bir sala – qurylys.
Onyń 5 aidaǵy ósimi 15,4%-dy, jumys kólemi 2 trln teńgeni qurady. Alaida, eki óńir, Atyraý men Ulytaý oblystary artta qalyp keledi. Atyraýda (jospardyń 43,2%) TShO jobasy sheńberinde zaýyt jumysynyń toqtaýyna bailanysty, Ulytaýda (78,4%) taý-ken óndirý salasyndaǵy nysandar salý men jóndeýdiń qysqarýyna bailanysty qarqyn báseńdegen.
Turǵyn úi qurylysy salasynda biyl 19 mln sharshy metr turǵyn úidi paidalanýǵa berý mindeti tur. Sońǵy 5 aida 6 mln sharshy metr turǵyn úi paidalanýǵa berilgen. Bul 2024 jylǵy qańtar-mamyrmen salystyrǵanda 5,7%-ǵa joǵary.
«Bizdiń maqsatymyz – biyl JIÓ 6%-dyq ósimine qol jetkizý. Ol úshin naqty sektordaǵy barlyq sala belgilengen indikatorǵa sáikes jumys isteýi tiis. Ákimshilik kedergilerdi jedel joiyp, kompaniialar óz ónimin shyǵarýdy ulǵaitýy úshin árbir saladaǵy qarqynnyń baiaýlaýy esebinen naqty ailyq josparlar ázirleý qajet», — dep atap ótti Serik Jumanǵarin.
