Foto: Aqorda
Memleket basshysy Qasym-Jomart Toqaev Qarjylyq monitoring agenttiginde jiyn ótkizip, sala qyzmetkerlerin kásibi merekesimen quttyqtady. Prezident agenttiktiń qysqa merzim ishinde eldiń ekonomikalyq jáne ulttyq qaýipsizdik júiesinde mańyzdy ról atqaratyn derbes qurylymǵa ainalǵanyn atap ótti, dep habarlaidy Ult.kz.
Jiynda Prezident agenttik bes jyl ishinde aýqymdy jumys atqaryp, mol tájiribe jinaqtaǵanyn aitty.
«Búginde Qarjylyq monitoring agenttigi elimizdiń ekonomikalyq jáne ulttyq qaýipsizdik júiesinde mańyzdy ról atqaratyn derbes qurylymǵa ainaldy. Muny tabandy eńbek pen adal qyzmettiń nátijesi deýge bolady. Agenttik qyzmetkerlerine rizashylyǵymdy bildiremin. Biraq bosańsýǵa bolmaidy», – dedi Qasym-Jomart Toqaev.
Memleket basshysy tsifrlyq tehnologiialar men jasandy intellekt dáýirinde quqyq qorǵaý organdarynyń jumys tásilin túbegeili jańartý qajettigin basa aitty.
«Quqyq qorǵaý mekemeleri, sonyń ishinde Qarjylyq monitoring agenttigi tehnologiialyq turǵydan artta qalyp qoisa, bul jaǵdai ulttyq qaýipsizdigimizge qater tóndirýi múmkin», – dedi Prezident.
Sondai-aq jiynda tsifrlyq tásilder men jasandy intellekt júiesin agenttik qyzmetine keńinen engizý – kezek kúttirmeitin mindet ekeni atap ótildi. Prezidenttiń aitýynsha, qylmystyq orta jańa tehnologiialardy belsendi paidalanyp otyr, sondyqtan quqyq qorǵaý organdary zaman talabyna sai ozyq bolýy tiis.
Qasym-Jomart Toqaev ekonomikalyq qylmystyń aldyn alýǵa basymdyq berýdiń mańyzyn da atap ótti. Onyń aitýynsha, shyǵyndy óteýden góri qylmystyń sebep-saldaryn anyqtap, aldyn alý áldeqaida tiimdi.
«Aldyn alý sharalary shyn máninde tiimdi bolý úshin tsifrlyq taldaý tásilderin barynsha damytqan abzal. Agenttikke tiesili aqparattyq júie aýqymdy derekterdi taldaýǵa múmkindik beredi», – dedi Memleket basshysy.
Prezident Qarjylyq monitoring agenttigine jasandy intellekt múmkindikterin paidalana otyryp, taldaý-saraptaý jumysyn kúsheitýdi jáne aqparattyq júielerdiń aiasyn keńeitýdi tapsyrdy.
