Búgin Úkimet otyrysynda Ulttyq ekonomika ministri Áset Erǵaliev úsh Ulttyq jobany tanystyrdy, dep habarlaidy QazAqparat.
«Qazaqstan Respýblikasy Prezidenti janyndaǵy Reformalar jónindegi joǵary keńestiń tapsyrmasyn oryndaý maqsatynda, Ulttyq ekonomika ministrligi múddeli memlekettik organdarmen birlesip úsh Ulttyq jobany ázirledi. Olar «Qazaqstandyqtardyń ál-aýqatyn arttyrýǵa baǵyttalǵan turaqty ekonomikalyq ósý» jáne «Kásipkerlikti damytý», sonymen birge «Qýatty óńirler – el damýynyń draiveri» atty Ulttyq jobalar. Atalǵan jobalar Elimizdiń 2025 jylǵa deiingi damýynyń ulttyq josparyn jáne «Nur Otan» partiiasynyń «Ózgerister joly: Ár azamatqa laiyqty ómir!» atty sailaýaldy baǵdarlamasyn iske asyrý boiynsha jol kartasyn oryndaý maqsatynda ázirlendi», - dedi Erǵaliev.
Onyń aitýynsha, «Qazaqstandyqtardyń ál-aýqatyn arttyrýǵa baǵyttalǵan turaqty ekonomikalyq ósý» Ulttyq jobasy kelesi 5 baǵytty qamtidy. Olar indýstriialyq-innovatsiialyq damý, munai-gaz-himiia, energetika keshenderin, geologiia salasyn damytý, sondai-aq shikizattyq emes eksportty arttyrýǵa qatysty. Atalǵan baǵyttardy iske asyrý aiasynda 6 mindet, 13 kórsetkish jáne 55 is-shara kózdelgen.
«Ulttyq jobany qarjylandyrýdyń jalpy kólemi 15,9 trln teńge, onyń ishinde respýblikalyq biýdjetten 402 mlrd teńge qarastyrylǵan. 15,5 trln teńgege jeke investitsiialar tartý kózdelip otyr. Ulttyq joba 2025 jylǵa qarai turaqty ekonomikalyq ósýdi 5 paiyzdan joǵary deńgeide qamtamasyz etýge baǵyttalǵan. Óńdeý ónerkásibi kásiporyndaryn tehnologiialyq jańǵyrtý boiynsha sharalar qabyldanatyn bolady. Óndiris kólemin ulǵaitýǵa jáne óńdeý ónerkásibi taýarlarynyń nomenklatýrasyn keńeitýge yqpal etetin 418 indýstriialyq jobany iske qosý josparlanýda. Ulttyq joba aiasynda 1000 belsendi eksporttaýshynyń syrtqy naryqtarǵa shyǵýy, sondai-aq 350 jýyq eksporttaýshyny «Alibaba» jáne «Amazon» siiaqty halyqaralyq elektrondyq platformalarǵa shyǵarý qamtamasyz etiletin bolady», - dedi ministr.
Sonymen qstar, óńdeý ónerkásibiniń joǵary tehnologiialyq ónimderin shyǵarý maqsatynda 2025 jylǵa qarai 5 munai-gaz-himiia zaýytyn paidalanýǵa berý josparlanýda.
Energetikalyq keshendi belsendi jańǵyrtý arqyly elektr energiiasyn óndirýdiń jalpy kólemindegi jańartylatyn energiia kózderiniń úlesi 6%-ǵa jetedi.
«Qabyldanǵan sharalar nátijesinde óńdeý ónerkásibi ónimderiniń óndirisi 1,5 esege artady. Shikizattyq emes eksport 2 esege ulǵaiyp, 2025 jyly 41 mlrd dollardy quraidy. Shikizattyq emes sektordyń negizgi kapitalyna investitsiialardy 75%-ǵa arttyrý josparlanýda. Ekonomikadaǵy eńbek ónimdiligi 1,2 esege ósedi. Energetikalyq keshendi jańǵyrtý esebinen 2000 megavatt jańartylatyn energiia kózderiniń qosymsha qýattaryn iske qosý júzege asyrylatyn bolady. Geologiialyq zertteletin aimaqtyń kólemi 2,3 mln. sharshy killometrge deiin ulǵaitý josparlanýda», - dedi Erǵaliev.
