Qazaqstandaǵy ekologiialyq jaýapkershiligi boiynsha túzilgen munai-gaz salasyndaǵy kompaniialarynyń reitingi jariialandy, dep habarlaidy QazAqparat tilshisi.
«Munai-gaz kompaniialarynyń ekologiialyq jaýapkershiligi BUU-nyń óńiraralyq bólimshesi, Dúniejúzilik jabaiy tabiǵat qory jáne KREON enerdji kompaniiasynyń yqpalymen elimizde ekinshi ret ótkizilýde. Munai-gaz salasyndaǵy aqparattyq qoljetimdilikti anyqtaý boiynsha turaqty negizde júrgiziletin jumys jer qoinaýyn paidalanýshylardyń ekologiialyq jaýapkershiligin arttyrýǵa oń áser etedi», - dedi Astanada ótken jiynda Energetika vitse-ministri Sábit Nurlybai.
Onyń aitýynsha, 2017 jyldyń qorytyndysy boiynsha reitingte birinshi oryn alǵan «QazMunaiGaz» kompaniiasy. Ekinshi orynǵa «Qarashyǵanaq Petroliým Opereiting» kompaniiasy turaqtasa, úshinshi orynnan «Petro Qazaqstan Qumkól Resorsiz» AQ ielengen.
«2018 jyldyń ekologiialyq is-sharanyń jeńimpazdaryn anyqtaý úshin 19 kompaniia qatysyp otyr. Jalpy, 2018 jyl elimizdiń munai gaz salalary úshin óte joǵary kórsetkishter boldy. 90 mln tonnadan astam munai óndirdik. 55 mlrd tekshe metr gaz shyǵaryldy. Osyǵan bailanysty munai-gaz sektory kompaniialardy óndirý jáne qaita óńdeýdiń ekologiialyq ziiansyz tehnologiialaryn engizýge barlyq múmkindikter bar dep oilaimyz», - dedi vitse-ministr.
Reiting boiynsha birinshi jáne ekinshi oryndy biyl da «QazMunaiGaz» UK» AQ jáne «Qarashyǵanaq Petroliým Opereiting» alyp otyr. Úshinshi orynǵa «Embimunaigaz» AQ turaqtasa, tórtinshi jáne besinshi orynda «Nort Kaspian Opereiting» jáne «Qarajambasmunai» AQ. Odan keiingi reitingti «Jaiyqmunai» JShS, «Teńizshevroil» JShS, «Kaspii munai» JShS, «SNPS-Aqtóbemuaigaz» AQ, «Qazgermunai» kompaniiasy, «Petro Qazaqstan Qumkól Resorsiz» AQ, «Qazaqoil-Aqtóbe» JShS, «Saýts Oil» JShS kompaniialary jalǵastyrady.
