3 jyldyń ishinde ekologiialyq zańnamany júieli buzatyn iri kásiporyndarǵa qatysty jaza kúsheitiledi. Bul týraly Senattyń jalpy otyrysynda «Ákimshilik quqyq buzýshylyq týraly kodeksine ekologiia máseleleri boiynsha ózgerister engizý týraly» zań jobasyn talqylaý kezinde Ekologiia, geologiia jáne tabiǵi resýrstar ministri Maǵzum Myrzaǵaliev málim etti, dep habarlaidy "Ult aqparat".
«Ákimshilik jaýapkershilikke tartý úshin belgilengen eskirý merzimin ulǵaitý jóninde túzetýler usynyldy. Atap aitsaq, jeke tulǵalarǵa qatysty merzimdi 2 aidan 1 jylǵa deiin, al zańdy tulǵalarǵa - 1 jyldan 3 jylǵa deiin ulǵaitý kózdelgen. Negizi profilaktikalyq tekserýler jylyna bir retten kóp ótkizilmeidi. Sonyn saldarynan, tekseris kezinde bir nemese odan kóp jyl buryn jasalǵan zań buzýshylyqtary anyqtalǵan kásiporyndar tiisti jazadan qutylyp ketip jatady. Taǵy bir aitatyny, tájiribe kórsetip otyrǵandai, keibir iri kásiporyndar júieli túrde jyl saiyn bir zań buzyshýlyqqa birneshe ret jol beredi. Osyǵan orai, zań jobasynda 3 jyldyń ishinde ekologiialyq zańnamany júieli buzatyn iri kásiporyndarǵa qatysty neǵurlym qatań jaza qoldaný qarastyrylǵan», - dedi ministr.
Onyń aitýynsha, atalǵan norma qazir de bar, biraq eskirý merzimi bir jyl bolǵandyqtan retsidiv institýty iske aspaidy. Bul óz kezeginde iri kásiporyndy júieli zań buzýshylyqtar jasamaýǵa yntalandyrmaidy. Osyǵan bailanysty, merzim 3 jylǵa deiin uzartyldy.
«Qorshaǵan ortany qorǵaý salasyndaǵy ákimshilik quqyqbuzýshylyq úshin belgilenetin aiyppuldardy ulǵaitýǵa basty sebepshi bolǵan jait - tabiǵat paidalanýshylardyń qorshaǵan ortanyń lastanýyna jol bermeý boiynsha sharalardy tolyqqandy oryndamaýy jáne qajetti modernizatsiiany júzege asyrmaýy. Negizi qazirgi ákimshilik aiyppuldar yntalandyrý tetigi bola almai tur. Bir sózben aitsaq, tabiǵat paidalanýshylary úshin quqyqbuzýshylyq pen jibergen olqylyqtardy joiýdyn ornyna aiyppul tóleý áldeqaida tiimdirek.
Sol sebepti ekologiialyq zań buzýshylyqtar úshin sanktsiialardy qatańdatý kózdeledi. Mysaly, qorshaǵan ortaǵa normativten tys jáne ruqsatsyz emissiialar úshin ákimshilik sanktsiialardyń mólsheri 10 ese, al qalǵan quqyq buzýshylyqtar boiynsha orta eseppen 2 ese ulǵaiady», - dedi Myrzaǵaliev.
