Búgin QR ekologiia, geologiia jáne tabiǵi resýrstar vitse-ministri Ahmetjan Pirimqulov jumys saparymen Pavlodar oblysynda bolyp, jańa Ekologiialyq kodekstiń normalaryn túsindirý jónindegi jiyn barysynda iri kásiporyndar qabyldaityn tabiǵatty qorǵaý sharalaryn da talqylady, dep habarlaidy "Ult aqparat".
«2020 jylǵy qyrkúiekte ekologiia ministrligi men Pavlodar oblysynyń ákimdigi óńirdiń ekologiialyq problemalaryn sheshý boiynsha Jol kartasyn bekitti. Ondaǵy emissiiany tómendetý, kógaldandyrý jáne qaldyqtardy qaita óńdeý bóliginde ekologiialyq problemalardy sheshý boiynsha naqty is-sharalar kózdelgen. Ministrlik Jol kartasynyń oryndalýyna erekshe kóńil bóledi. 2020 jylǵy qujatta Pavlodar qalasynda jyl saiyn 2 gektar ósimmen kógaldandyrýǵa jer telimderin bólý qarastyrylǵan», - dedi ekologiia ministrligi basshysynyń orynbasary.
Ahmetjan Pirimqulov ERG kompaniiasyn aǵashtardyń úlken kólemin otyrǵyzý arqyly óńirdiń jasyl qoryn ulǵaitýǵa shaqyrdy.
«Ótken aptada ministrlikte jinalys ótkizdik, onda ERG kompaniiasy men oblystyń basqa da kásiporyndary aǵashtardyń úlken kólemin otyrǵyzýǵa daiyn ekendikterin bildirdi, tek jer telimderiniń joqtyǵy týraly másele týyndady», - dep atap ótti ekologiia vitse-ministri.
Ol oblys basshylyǵyna kompaniia basshylyǵymen kezdesý ótkizip, aǵash otyrǵyzatyn jer telimderin anyqtaýdy usyndy.
Vitse-ministr kótergen taǵy bir mańyzdy másele – avtojoldar qurylysy kezinde kúl men shlak qaldyqtaryn paidalaný.
«Elektr energiiasyn óndirý nátijesinde «Ekibastuz GRES-1» JShS-de jyl saiyn 4,5 mln.tonnaǵa deiin kúl-shlak qaldyqtary shyǵarylady. Jalpy, kúl úiindisine 166 mln. tonnadan astam kúl-shlaktar kómilgen. 2020 jyly Ekibastuz GRES-1-niń kúl-shlak qaldyqtary avtojoldar qurylysyna tartylmaǵan. Oblys ákimdigine osy qaldyqtardy oblystyq mańyzy bar joldardy salý úshin neǵurlym belsendi tartý qajet. Budan basqa, tabiǵatty qorǵaý sharalarynda kúl-shlak qaldyqtaryn qaita paidalaný jolymen qysqartý boiynsha utymdy sharalar kózdelmegen», - dep atap ótti Ahmetjan Pirimqulov.
Sondai-aq, vitse-ministr jumys sapary barysynda óńirdiń iri ónerkásiptik kásiporyndaryna baryp, qaldyqtardy qaita óńdeý, lastaýshy zattardyń shyǵaryndylaryn ólsheýdi avtomattandyrý, qurǵaq jaǵajailardyń paida bolýyn joiý jáne t.b. boiynsha qabyldaǵan sharalarymen tanysty.
