Sýdy únemdep paidalaný, qaldyqtardy qaita óńdeý jáne aimaqtardaǵy qorshaǵan ortany qorǵaý problemalaryn sheshý. Osy jáne ózge de túiindi máseleler «Nur Otan» janyndaǵy Ekologiialyq keńestiń otyrysynda talqylandy, - dep habarlaidy partiianyń baspasóz qyzmeti.
Ekologiia, geologiia jáne tabiǵi resýrstar vitse-ministri Ahmetjan Pirimqulov partiialyqtardy «Jasyl Qazaqstan» ulttyq jobasyn júzege asyrý jospary týraly habardar etti. Onyń aitýynsha, sýarý kezindegi sý shyǵynyn qysqartý úshin 401 kanaldy rekonstrýktsiialaý jáne taǵy 212-sin tsifrlandyrý josparlanyp otyr.
«Syrdariia ózeniniń problemalaryn sheshý jáne Aral teńiziniń soltústik bóligin saqtaý jumystaryn jalǵastyramyz. 4 kól – Býrabai, Shortandy, Qopa, Shalqar qalpyna keltiriledi. Turmystyq qatty qaldyqtardy kádege jaratý úlesi qaldyqtardy energetikalyq ýtilizatsiialaý nysandaryn salý esebinen 18-den 34%-ǵa deiin ósedi. Jalpy, ulttyq jobany iske asyrý arqyly 60 myńǵa jýyq jumys orny ashylady», - dedi vitse-ministr.
Vedomstvonyń qaldyqtardy óńdeýge qatysty kemshilikterine Keńes tóraǵasynyń orynbasary, Májilis depýtaty Edil Jańbyrshin nazar aýdardy. Onyń aitýynsha, kóptegen óńirlerde qoqysty bólek jinaý protsesi jolǵa qoiylmaǵan.
«Bizdegi turmystyq qatty qaldyqtardy jinaý jáne tasymaldaý operatorlary, poligondardyń ieleri jáne qaita óńdeýshi kompaniialar bir-birinen múldem bólek salada jumys istep jatqandai. Quramynda synaby bar qaldyqtardy jinaýǵa arnalǵan konteinerlerdiń jaǵdaiy she? Kezinde mundai konteinerler Aqtaýda qoiylyp edi. Biraq olar áldeqashan synǵan. Mundai qaldyqtar qazir qaida tasymaldanady, olardy kim joiady? Tek konteiner ornatýmen másele sheshilmeidi»,- dedi Edil Jańbyrshin.
Sonymen qatar, Keńes múshesi, Májilis depýtaty Dúisenbai Turǵanov Jaiyq ózeniniń jaiyn qozǵady.
«Talqylaýmen ainalysyp kele jatqanymyzǵa 10 jyldan astam ýaqyt boldy. Áli kúnge deiin naqty is-áreket joq. Tek qana zertteý. Jaiyqty erekshe memlekettik mańyzy bar sý nysandarynyń qataryna qosýdy surap bir jyl buryn resmi saýal joldadym, biraq áli kúnge deiin eshteńe jasalmady», - dedi halyq qalaýlysy.
Ekologiia ministrligi jumysynyń jabyqtyǵyna «Nur Otan» partiiasynyń Batys Qazaqstan oblystyq filialy janyndaǵy ekokeńes tóraǵasy Darhan Sariev nazar aýdardy.
«Qazaqstan-Resei komissiiasynyń Jaiyq boiynsha jumysy jasyryn júrgizilýde. Eshqandai aqparat joq. Jalpy bizdegi sýǵa qatysty problemalar – gidrologiialyq analitikanyń álsizdiginiń saldary. Máselen, oblystaǵy jeke kompaniialardyń birinde 18 gidrologiialyq beket bar, al memlekette búkil óńir boiynsha bar bolǵany 20 ǵana. Olar barlyq negizgi sý nysandaryna jetpeidi. Jer asty sýlary boiynsha da zertteýlerdiń bar-joǵy túsiniksiz», - dedi Darhan Sariev.
Óz kezeginde «Nur Otan» partiiasy Qaraǵandy oblystyq filialy janyndaǵy ekologiialyq keńestiń múshesi Dmitrii Kalmykov Ekologiia ministrliginiń Qoǵamdyq tyńdaýlar ótkizýdiń jańa erejeleri jobasyn synǵa aldy.
«Qujat tolyqqandy qoǵamdyq tyńdaýlardy ecoportal.kz-te qaralatyn qujattarǵa birjaqty pikir bildirýge aýystyrýdy qarastyrady. Sonymen qatar, munda turǵyndardyń suraq qoiýǵa jáne olarǵa jaýap alýǵa múmkindigi joq. Ýákiletti organ azamattardyń aqparatqa jáne sheshim qabyldaý rásimine qol jetkizý quqyqtary men múmkindikterin edáýir qysqartýdy usynatyny ereje jobasyn taldaýdan anyq kórinedi», – dedi Dmitrii Kalmykov.
Otyrys barysynda nurotandyqtar partiianyń óńirlik filialdary janyndaǵy Ekologiialyq keńester jumysynyń aralyq qorytyndysyn shyǵardy. Mysaly, Soltústik Qazaqstan oblysynda Aiyrtaý jáne Ǵ.Músirepov atyndaǵy aýdandarda ýran ken oryndaryna qatysty máselelerdiń túiini tarqaýǵa taiaý. Qazirgi ýaqytta aýdandyq ákimdiktermen óńdelgen ýran kenishteri kommýnaldyq menshikke qabyldanyp, aýyldyq okrýgter ákimdikteriniń balansyna bekitildi.
Biyl 100 myńnan astam aǵash otyrǵyzylǵan Qyzylorda oblysynyń ekologiialyq problemalary da óz sheshimin tabýda.
Almaty qalasynda partiia músheleriniń belsendi jumysynyń arqasynda qoqystardy shyǵarý jáne barlyq bei-bereket qoqys oryndary joiyldy. Keńes tóraǵasy Eldos Abaqanov atap ótkendei, partiianyń sailaýaldy ýádeleri aiasynda Almatyda JEO-2-ni gazǵa kóshirý jáne 1 mln. aǵash otyrǵyzý qarastyrylǵan. Turmystyq qatty qaldyqtardy qaita óńdeý jáne kádege jaratý úlesi 8-den 14%-ǵa deiin ósti.
Jiyn qorytyndysynda Ekologiia ministrligine birqatar usynymdar ázirlendi. Atap aitqanda, «Jasyl Qazaqstan» ulttyq jobasynyń iske asyrylýyna partiialyq monitoringti qamtamasyz etý, qaldyqtardy basqarý salasynda ozyq tehnologiialardy odan ári engizý. Sonymen qatar, Jaiyq ózeniniń problemalaryna qatysty Keńes arnaiy otyrys ótkizedi.
