Ekologiia, geologiia jáne tabiǵi resýrstar ministrligi ǵalymdarmen birlesip, qyrylǵan itbalyqtardyń azý tisterin qarap, zertteý arqyly birneshe qorytyndy jasady, dep habarlaidy QazAqparat.
Ministrliktiń habarlaýynsha, olardyń neden qyrylǵanyn naqty anyqtaý múmkin bolmady, óitkeni tabylǵan itbalyqtardyń denesi ydyrap ketken.
«Itbalyqtardyń jańa týǵan aqkúshikteri muzben birge ashyq teńizge shyqqan nemese olar tikelei teńizdegi sýǵa túsip, álsirep qalǵan. Ózderińiz biletindei, bul aimaqta 2021-2022 jyldyń qysy óte jyly boldy, bul muz quramyna jáne onyń qatty jabynyna teris áser etti, sáikesinshe tirshilik etý kezinde nemese qatty jel saldarynan muz bólingen. Itbalyqtar kúshiktermen birge ashyq teńizde qalǵan jáne bir-birimen bailanys úzilip, jańa týǵan kúshikter álsirep ólgen», - dedi Orman sharýashylyǵy jáne janýarlar dúniesi komitetiniń bas sarapshysy Baqytjan Isaqaev.
Onyń aitýynsha, itbalyq qańqalarynan mehanikalyq zaqymdar, onyń ishinde zańsyz aýlaý quraldaryna, torǵa túskeni anyqtaldy.
Negizinen bul torlar bekire tuqymdas balyqtardy aýlaý úshin qoiylady. Kemelerdiń burandalarynan da zaqym alýy múmkin.
«Ǵylymi qaýymdastyq pen memlekettik organdar Qashaǵan aýdanynda júrgizilip jatqan tereńdetilgen jumystar itbalyqtardyń tirshiligine jáne olardyń qyrylýyna sebep bola almaidy degen qorytyndyǵa keldi», - dedi ol.
