Foto: Akorda.kz
Memleket basshysy Ekologiia jáne tabiǵi resýrstar ministri Zúlfiia Súleimenovany qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke elimizdegi vegetatsiialyq kezeń barysy jáne orman sharýashylyǵy men janýarlar álemine qatysty máseleler jóninde málimet berildi.
Qasym-Jomart Toqaevqa orman sharýashylyǵyn materialdyq-tehnikalyq turǵydan jabdyqtaý, sonyń ishinde tehnika satyp alý jáne yqtimal orman órtin aldyn ala anyqtaý júielerin ornatý boiynsha qabyldanyp jatqan sharalar jóninde baiandaldy.
Zúlfiia Súleimenova Memleket basshysyna tabiǵatty qorǵaý jáne orman sharýashylyǵy mekemelerine qajetti órtke qarsy qural-jabdyqtar men tehnikalardyń tizimin keńeitý úshin tiesili normalardy jańartý jumystary bastalǵanyn aitty.
Budan bólek, Ekologiia jáne tabiǵi resýrstar ministri negizgi ózen basseinderindegi, ásirese, elimizdiń ońtústik aimaqtaryndaǵy sý tapshylyǵy jaǵdaiynda vegetatsiialyq kezeńniń qalypty ótýi úshin qabyldanyp jatqan sharalar jóninde málimet berdi.
Kezdesý sońynda Prezident tabiǵatty qorǵaý bólimsheleriniń materialdyq-tehnikalyq bazasyn kúsheitý isin keshendi túrde júzege asyrý mańyzdy ekenin atap ótti.
Sonymen qatar Qasym-Jomart Toqaev tabiǵatty qorǵaý zańnamasynyń buzylý faktilerin anyqtap, olardy joiý úshin quqyq qorǵaý organdarymen tyǵyz qarym-qatynasta jumys isteý qajettigine nazar aýdardy. Sondai-aq qajet jaǵdaida quqyq buzýshylardy qylmystyq jaýapkershilikke tartý kerek ekenin atap ótti.
