Elordada «AMANAT» partiiasynyń Qoǵamdyq saiasat institýty janynan iske qosylǵan «TALQYLAU» dialog alańynyń ekinshi otyrysy ótti. Institýttyń telegram arnasynda daýys berý qorytyndysy boiynsha anyqtalǵan talqylaý taqyryby Memleket basshysy aitqan memleketti transformatsiialaý jónindegi ideologema – «Ekinshi Respýblika» boldy, dep habarlaidy "Ult aqparat" partiianyń baspasóz qyzmetine silteme jasap.
Áleýmettik jelilerde tikelei efirde taratý arqyly ótken ashyq pikirtalas barysynda sarapshylar, qoǵam qairatkerleri, Májilis depýtattary el Prezidenti usynǵan reformalarǵa qatysty óz pikirlerin ortaǵa saldy.
Otyrysqa qatysqan QR Memlekettik hatshysy Erlan Qarin bul termin bilik institýttary arasynda neǵurlym tiimdi teńgerim jasaityn memlekettik basqarý modeliniń ózgerýin beineleitinin atap ótti.
«Jańa Qazaqstan» – bul mańyzdy qoǵamdyq transformatsiiany júzege asyratyn keń aýqymdy ideologema bolsa, «Ekinshi Respýblika» – bul memlekettik modeldi ózgertý. Iaǵni, birinshi jaǵdaida qundylyqtar deńgeiinde, al ekinshi jaǵdaida – bul institýtsionaldyq, quqyqtyq deńgeide júzege asatyn ózgerister.16 naýryzdaǵy Joldaýda Prezident naqty jańa saiasi bastamalardy jariia etkenin jáne olardy júzege asyrý is júzinde bastalyp ketkenin eskersek, «Ekinshi respýblikaǵa» kóshý jaqyn arada oryn alady dep aitýǵa bolady», dedi Erlan Qarin.
Memlekettik hatshy Prezidenttiń jańa bastamalary búkil saiasi júieni jańǵyrtyp, qaita bastaýdy bildiretinin atap ótti. Jańa zańdar qabyldanyp, Konstitýtsiiaǵa ózgerister engizilgennen keiin is júzinde osy jyldyń ózinde Qazaqstanda memlekettik basqarýdyń jańa modeline kóshý júzege asyrylady. Ol tejemelik ári tepe-teńdik júiesin institýtsionaldyq turǵydan kúsheitip, jańa saiasi mádeniettiń qalyptasýyna yqpal etedi.
Óz kezeginde «AMANAT» partiiasynyń Atqarýshy hatshysy Ashat Oralov elimizde saiasi júieni transformatsiialaý partiiany jańǵyrtýdan bastalǵanyn atap ótti.
«Zańnamany liberalizatsiialaýdy, jańa partiialardy tirkeý resimderiniń jeńildetilýin eskersek, elimizdiń partiialyq-saiasi alańyna jańa uiymdardyń keletinin túsiný qiyn emes. Bul jaǵdai – bizdiń partiiamyz úshin óziniń uzaq merzimdi, jaýapty kóshbasshylyqqa jáne básekelestikke daiyn ekenin dáleldeý múmkindigi. Osy alańdaǵy kezdesý «AMANAT» syndarly dialog aiasynda Qazaqstandy damytý boiynsha naqty ideialar men usynystar ázirlenetin saiasi mádenietti arttyrýǵa barynsha yqpal etetinin kórsetedi», dep atap ótti Ashat Oralov.
«Alternativa» ózekti zertteýler ortalyǵynyń direktory Andrei Chebotarevtiń aitýynsha, «respýblika» árkez sailaý jolymen qalyptasatyn memlekettik bilik júiesin aiqyndap keldi.
«Biz Qasym-Jomart Toqaevtyń prezidenttik kezeńinde sailaý júiesi qanshalyqty qarqyndy reformalanyp jatqanyn kórip otyrmyz. Aldymen aýyl ákimderin sailaý institýty engizildi. Keiin aýdan ákimderi sailanady. Sailaý protsesine majoritarlyq júieniń elementterin qaitarý jumysy júrip jatyr. Bul da jańashyldyqtyń, jaqsylyqtyń nyshany. Bul tek ideologiianyń nemese uǵymdardyń ózgerýi ǵana emes, anyǵynda bul alǵa jyljýdyń, damýdyń aiǵaǵy», dep tolyqtyrdy Andrei Chebotarev.
Májilis depýtaty Aidos Sarymnyń pikirinshe, búginde qazaqstandyqtar Konstitýtsiia ǵana emes, memlekettik basqarý júiesi de ózgerip jatqan tarihi kezeńde ómir súrip jatyr.
«Biz memlekettiliktiń burynǵy formatynan bas tartpaimyz. Alaida oǵan qaityp oralmaitynymyzdy da túsingen jón. Jasyratyny joq, el azamattarynyń basym kópshiligi ózge memleketterdiń, qaisybir ýtopiialardyń sezimimen ómir súredi. Qazir óz keńistigimizge oralyp, óz kún tártibimizben ómir súrýdi úirený mańyzdy», dedi depýtat.
Kezdesý barysynda Eýraziialyq integratsiia institýtynyń direktory Orazǵali Selteev, Eýropalyq quqyq jáne adam quqyqtary institýtynyń direktory, professor Marat Báshimov óz pikirlerimen bólisti. Zaldaǵy qatysýshylar ǵana emes, onlain-kórermender de suraqtaryn qoidy.
Esterińizge sala keteiik, «TALQYLAU» dialog alańyn qurý bastamasy «AMANAT» partiiasynyń 1 naýryzda ótken kezekten tys Sezinde partiialyq transformatsiia baǵdarlamasy tarmaqtarynyń biri retinde kóterilgen bolatyn. Aldaǵy ýaqytta «TALQYLAU» otyrystary túrli formatta uiymdastyrylyp, onda pikirtalas, podkasttar jazý, debattar qolǵa alynady. Alańda sarapshylar, depýtattar, memlekettik organdar men ÚEU ókilderi azamattardy tolǵandyratyn ózekti máselelerdi sheshý jónide usynystar ázirleý úshin turaqty túrde kezdesip otyrady.
