Úkimet otyrysynda Ekibastuz qalasyn áleýmettik-ekonomikalyq damytýdyń 2025 jylǵa deiingi keshendi jospary talqylandy, dep habarlaidy QazAqparat.
QR Ulttyq ekonomika ministri Áset Erǵalievtiń aitýynsha, qalanyń damytýǵa aldaǵy úsh jylda 932,8 mlrd teńge jumsalmaq.
«Keshendi jospar investitsiialyq jobalardy iske asyrýdy, turǵyn úi infarqurylymyn, áleýmettik salany damytýdy, azamattardyń qaýipsizdigin qamtamasyz etýdi jáne ekologiialyq máselelerdi jaqsartýdy kózdeitin 114 is-sharadan turady.
Jospardy iske asyratyn investitsiialardyń jalpy somasy 932,8 mlrd teńgeni quraidy. Onyń ishinde respýblikalyq biýdjetten 64,7 mlrd teńge, jergilikti biýdjetten 33,5 mlrd teńge, jeke investitsiialar 834,6 mlrd teńge», - dedi ministr.
Onyń aitýyna qaraǵanda, qarastyrylyp otyrǵan somany negizgi bóligi ekonomikalyq salalarǵa baǵyttalmaq.
«Jalpy somasy 822,3 mlrd teńgege qalanyń ekonomikasyn damytý úshin ónerkásipti, agroónerkásiptik keshendi, energetikany, sondai-aq, kásipkerlikti damytýǵa baǵyttalǵan 35 is-sharany iske asyrý kózdelgen», - dedi Áset Erǵaliev.
