Premer-Ministrdiń orynbasary - Saýda jáne integratsiia ministri Serik Jumanǵarin Ekibastuz jylý-elektr ortalyǵyn memleket menshigine berý máselesin qarastyrý qandai kezeńde turǵanyn aitty, dep habarlaidy QazAqparat.
«Bul másele áli taldaý satysynda tur. Munda sheshim qabyldamai turyp, onyń jaǵdaiyn tekserý kerek. Eger bul memleketke úlken aýyrtpalyq salsa jáne is júzinde biz obektini alyp, iesine syilyq jasaǵandai bolamyz. Sosyn oǵan barlyq qarajatty salamyz. Sondyqtan, eń aldymen, jaǵdaidy birlesip túzetý máselesin qarastyrý qajet», - dedi Serik Jumanǵarin Úkimette jýrnalisterge bergen suhbatynda.
Sonymen birge Serik Jumanǵarin Aleksandr Klebanovtyń Ekibastuz JEO-syn memleketke bir teńgege satýǵa daiyndyǵy týraly pikir bildirdi.
«Úkimet bul ortalyqty bir teńgege satyp alyp, 1 mlrd teńge shyǵynǵa ushyraýy múmkin. Sol úshin JEO jai-kúiin tolyq qarastyryp, qansha qarajat ketetinin taldaý kerek», - dedi ministr.
Eske salaiyq, buǵan deiin Májilis depýtaty Erlan Saiyrov oligarh Aleksandr Klebanov ózi baqylaityn Ekibastuz jylý elektr ortalyǵyn memleketke apatty kúiinde 1 teńgege satqysy keletinin málimdedi.
Depýtattyń aitýynsha, Ekibastuz qalasynyń ákimshilinde ótken jinalysta bai biznesmen osyndai usynys tastaǵan. 27 qarashaǵa qaraǵan túni Ekibastuz JEO-da qazandyqtar isten shyǵyp, turǵyndar qaqaǵan aiazda jylýsyz qaldy. Ertesine qalada tótenshe jaǵdai jariialandy.
Búgingi kúni Ekibastuzdyń 6, 5a jáne 5b shaǵynaýdandarynda jylý berýdi qalpyna keltirý jumystary jalǵasyp jatyr.
Apatty joiý jónindegi shtab basshysy – QR Premer-Ministriniń birinshi orynbasary Roman Skliardyń habarlaýynsha, 6 jeltoqsan saǵat 08.00-degi jaǵdai boiynsha kireberisterdi jylýǵa qosý jumystary 4 úide júrgizilip jatyr. Bul jumystardy búgin aiaqtaý josparlanǵan. Zardap shekken nysandarǵa bekitilgen kásiporyndar táýlik boiy injenerlik kommýnikatsiialardy qalpyna keltirý jumystarymen ainalysyp jatyr.
