Ekibastuz mańynda vahta jumysshylary mingen avtobýs apatqa ushyrady. Jol-kólik oqiǵasy saldarynan 16 adam zardap shekti, olardyń bári Ekibastuz qalalyq aýrýhanasyna jetkizildi. Politseiler jol apatynyń sebepterin anyqtap jatyr, - dep habarlaidy Tengrinews.kz tilshisi.
"103" jelisine iri apat týraly habarlama 26 shildede saǵat 12.38-de túsken.
"Qońyraý shalǵandardyń aitýynsha, jumysshylar mingen avtobýs Ekibastuzdan 25 shaqyrym jerde aýdarylyp ketken. Oqiǵa ornyna bes jedel járdem brigadasy jóneltildi. Qońyraý túskennen keiin 14 minýt ótkende meditsina qyzmetkerleri oqiǵa ornyna jetip, zardap shekkenderge kómek kórsetti", - dedi Pavlodar oblystyq jedel járdem stantsiiasy ókilderi.
"103" qyzmetkerleri Ekibastuz qalalyq aýrýhanasynyń jedel járdem bólimine taǵy da jaraqat alǵadar bolýy múmkin ekenin eskertti. Jedel járdem brigadalarynyń biri zardap shekkenderge kómek kórsetý úshin oqiǵa ornynda qaldy.
"Ekibastuz qalalyq aýrýhanasyna 16 adam jetkizildi. 19 ben 53 jas aralyǵyndaǵy er adamdar bas-mi jaraqatyn alyp, miy shaiqalyp, túrli jaraqat alǵan", - dedi "103" baspasóz qyzmeti ókilderi.
Pavlodar oblysynyń Densaýlyq saqtaý basqarmasy zardap shekkenderdiń bári qazir dárigerlerge qaralyp jatqanyn habarlady.
Oqiǵa sebepteri anyqtalyp jatyr. Oblystyq Politsiia departamentiniń baspasóz qyzmeti málimetinshe, jol apaty "Pavlodar-Nur-Sultan" tasjolynyń 139-shaqyrymynda, Baiet aýyly mańynda bolǵan.
"40 jastaǵy avtobýs júrgizýshisi rólge ie bola almai, shuńqyrǵa aýdarylyp ketken. Oqiǵa ornynda politsiia qyzmetkerleri men jedel járdem qyzmetkerleri jumys istep jatyr", - dedi oblystyq PD baspasóz qyzmeti ókilderi.
