Jýyq arada eldiń ońtústik óńirlerinen soltústik aimaqtaryna qonys aýdarýshylarǵa turǵyn úi salý jáne satyp alý mehanizmi iske qosylmaq. Bul jospardy oryndaý úshin 2019-2021 jyldary biýdjetten 15 mlrd teńge bólinbek, dep habarlaidy QazAqparat tilshisi.
«Eńbek resýrstarynyń utqyrlyǵyn arttyrý sheńberinde jumys kúshi kóp ońtústik óńirlerden 1 488 otbasy nemese 4 925 adam qonys aýdardy. Onyń ishinde eńbekke qabiletti jastaǵy 2,5 myń adam qatarynan 1,5 myńǵa jýyǵy jumysqa ornalastyryldy. 87 adam kásipkerlikpen ainalysýda», - deidi Mádina Ábilqasymova búgingi Úkimet otyrysynda.
Ministrdiń aitýynsha, biyl Pavlodar oblysyna - 361 otbasy, Soltústik Qazaqstan oblysyna - 400 otbasy, Qostanai oblysyna - 224 otbasy, Shyǵys Qazaqstanǵa - 413 otbasy jáne Aqmola oblysyna - 90 otbasy qonys aýdarǵan.
«Jumys kúshi jetispeitin óńirlerge qonystaný kezinde qonys aýdarǵan adamdardy turǵyn úimen qamtamasyz etý máselesi mańyzdy faktor bolyp tabylady. Ol úshin Memleket basshysynyń tapsyrmasy boiynsha Memlekettik baǵdarlamada jumys berýshilerdiń qatysýymen qonys aýdarýshylarǵa turǵyn úi salý jáne satyp alý mehanizmi kózdelgen. Bul tásil aldymen Soltústik Qazaqstan oblysynda aprobatsiiadan ótkizilip, keiin basqa óńirlerde qoldanylady», - deidi Mádina Ábilqasymova.
Ministr atap ótkendei, búgingi tańda 2019-2021 jyldary osyǵan qajetti 15 milliard teńge qarajat biýdjette kózdelgen.
«Nátijesinde oblysta aldaǵy úsh jylda úsh myńǵa jýyq qonys aýdarýshy otbasyn turǵyn úimen qamtamasyz etý josparlanyp otyr», - deidi Mádina Ábilqasymova.
Eske sala ketsek, buǵan deiin Eńbek jáne halyqty áleýmettik qorǵaý ministri Mádina Ábilqasymova nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan memlekettik baǵdarlamasy qalai júzege asyrylyp jatqanyn baiandaǵan edi.
Óz kezeginde Úkimet basshysy Baqytjan Saǵyntaev halyqty jumyspen qamtý jumystarynyń áserine monitoring júrgizýdi tapsyrǵan bolatyn.
