Foto: primeminister.kz
Premer-Ministr Álihan Smaiylov XIII «INNOPROM» halyqaralyq ónerkásiptik kórmesine qatysý úshin Ekaterinbýrg qalasyna jumys saparymen bardy. Úkimet basshysy, eń aldymen, qaladaǵy Qazaqstannyń Bas konsýldyǵynyń ashylý rásimine qatysty, dep habarlaidy "Ult aqparat" primeminister.kz saityna silteme jasap.
Bas konsýldyq jumysy Qazaqstan Respýblikasynyń óńirleri men kásiporyndarynyń Resei Federatsiiasy óńirlerimen saýda-ekonomikalyq jáne mádeni-gýmanitarlyq yntymaqtastyǵyn keńeitýge, sondai-aq tiisti konsýldyq qyzmetterdiń qoljetimdiligin arttyrýǵa baǵyttalǵan.
Jańa diplomatiialyq nysannyń jumysy Oral federaldy okrýginiń búkil aýmaǵyn, atap aitqanda Sverdlov, Cheliabi, Qorǵan, Túmen oblystaryn, sonymen qatar Perm ólkesin qamtidy. Jalpy osy konsýldyq okrýgtiń aýmaǵynda 90 myńnan astam qazaq, onyń ishinde Qazaqstannan kelgen 7 myńnan astam stýdent bar.
Ákimshilik ortalyǵy jáne eń úlken qalasy Ekaterinbýrg bolyp tabylatyn Oral federaldy okrýgi – Resei Federatsiiasynyń qarqyndy damyp kele jatqan ónerkásip, ǵylym-bilim, kólik-logistikalyq jáne qarjy ortalyqtarynyń biri. Munda iri ǵylymi jáne óndiristik birlestikter ornalasqan. Ónerkásiptik óndiristegi ekonomikalyq qyzmettiń negizgi túrleri joǵary ǵylymi-tehnikalyq áleýeti bar mashina jasaý jáne metall óńdeý ónerkásibi bolyp otyr.
Saltanatty rásim kezinde Úkimet basshysy Álihan Smaiylov pen Sverdlov oblysynyń gýbernatory Evgenii Kýivashev qyzyl lentany qiyp, artynsha Bas konsýldyqtyń ǵimaratyn aralady.
Premer-Ministrdiń aitýynsha, Oraldyń qaq ortalyǵynda Bas konsýldyqtyń ashylýy bizdiń dostyq qarym-qatynastarymyzdyń damýyna eleýli serpin beredi.
Sonymen qatar Úkimet basshysy 10 jyl buryn Ekaterinbýrgte eki el prezidentteri qol qoiǵan HHI ǵasyrda tatý kórshilik pen odaqtastyq týraly shart aiasynda strategiialyq áriptestikti odan ári nyǵaitý sharalary belsendi jalǵasyp kele jatqanyn atap ótti.
«Búginde Qazaqstannyń oblystary men qalalarynyń Resei sýbektileriniń kópshiligimen turaqty dialogy ornatylǵan. Bul turǵyda Oral aimaǵy geografiialyq jaqyndyǵy jaǵynan da, ónerkásibi damyǵan Sverdlov, Qorǵan, Túmen, Cheliabi oblystarymen jáne Perm ólkesimen qalyptasqan saýda-ekonomikalyq bailanystar jaǵynan da óte mańyzdy», — dedi Álihan Smaiylov.
Sóz sońynda Premer-Ministr QR Bas konsýldyǵy memleketaralyq yntymaqtastyqty damytý úshin jańa múmkindikter ashatynyna senim bildirip, onyń qyzmetkerleriniń jumysyna tabys tiledi.
