Egov.kz portalynda áleýmettik tólemder men járdemaqylar rásimdeý úshin arnaiy shot avtomatty túrde qoljetimdi boldy, dep habarlaidy QazAqparat.
«Ulttyq aqparattyq tehnologiialar» AQ qoǵammen bailanys basqarmasynyń málimetinshe, protsesti qaita qaraýdyń arqasynda jeti áleýmettik tólem alý yńǵaily ári jeńildei tústi. Elektrondyq úkimet portalynda úsh banktiń arnaiy shottary avtomatty túrde ashylady.
«Endi eGov.kz portalynda áleýmettik tólemderdi, járdemaqylardy jáne zeinetaqylardy rásimdeý úshin ótinish bergen kezde 20 tańbaly shot nómirin (IBAN) qolmen engizýdiń qajeti joq. Júie qoljetimdi shottardy ótinish berýshiniń JSN-i boiynsha alady, bul óz kezeginde shot nómirin qate engizýge jol bermeidi. Járdemaqy alý úshin arnaiy shotty elimizdiń úsh bankinde ashýǵa bolady: Halyk Bank, Kaspi.kz jáne «Bank TsentrKredit» AQ», - delingen habarlamada.
Bul fýnktsiia Eńbek jáne halyqty áleýmettik qorǵaý ministrliginiń kelesi áleýmettik memlekettik qyzmetterinde qoljetimdi: bala týýǵa jáne bala kútimine bailanysty járdemaqy taǵaiyndaý; múgedek balany tárbielep otyrǵan anasyna nemese ákesine, asyrap alýshyǵa járdemaqy taǵaiyndaý; múgedektik boiynsha memlekettik áleýmettik járdemaqylardy taǵaiyndaý; asyraýshysynan aiyrylý jaǵdaiy boiynsha memlekettik áleýmettik járdemaqylar taǵaiyndaý; jerleýge arnalǵan birjolǵy tólemdi taǵaiyndaý; kóp balaly otbasyǵa memlekettik járdemaqy taǵaiyndaý; memlekettik bazalyq zeinetaqy tólemin taǵaiyndaý.
«Buryn jeńildikter men tólemderge ótinish bergende shot nómirin qolmen engizý qajet bolatyn, paidalanýshylar shot nómirin engizý kezinde jii qatelesetin. Endi qajetti bankti durys tańdaǵan jaǵdaida, shot avtomatty túrde paida bolady. Eger shotyńyz joq bolsa, onda qyzmetti alý kezinde ashýǵa bolady. Jańa fýnktsiia ýaqytty únemdeidi jáne áleýmettik tólemder men járdemaqylardy óńdeý protsesin aitarlyqtai jeńildetedi», - dep túsindirdi vedomstvodan.
