QR Tsifrlyq damý, innovatsiialar jáne aeroǵarysh óndirisi ministri Asqar Jumaǵaliev eGov-tyń jańartylǵan mobildi qosymshasy iske qosylatynyn málim etti, dep habarlaidy QazAqparat.
«Biz memlekettik qyzmetterdi mobildi túrde alýǵa basa kóńil bólip otyrmyz. Óitkeni, búgingi tańda azamattardyń bárinde smartfon bar. Sol sebepti, eGov-tyń mobildik qosymshasyn jańartý jumystary bastalǵan kezde áriptesterime – eń aldymen, bul qosymshany ózderińizdiń analaryńyz paidalana alatyndai yńǵaily etip jasańyzdar dedim. Sebebi, qosymsha qyzmetti ońai ári jyldam alý úshin yńǵaily bolýy kerek», - dedi Asqar Jumaǵaliev elordadaǵy «Tsifrlyq kúz» sharasynda.
Ministrdiń sózine sensek, jańa qosymshanyń kómegimen qyzmetti saýsaqpen bir basyp qana alýǵa bolady. Mobildi qosymshanyń Beta nusqasy PlayMarket jáne Appstore-da jaqyn arada qoljetimdi bolady. Ol arqyly qyzmettiń 23 túrin alýǵa, ETsQ-ǵa ótinim berýge múmkindik bar.
«Tsifrlyq kúzge» jinalǵandarǵa mobildik qosymshanyń múmkindikterin tanystyrǵan «Ulttyq aqparattyq tehnologiialar» AQ Basqarma tóraǵasy Áset Turysov ETsQ-ny paidalanýdy barynsha jeńildetýge kúsh salynǵanyn tilge tiek etti.
«Jańa qosymshany paidalaný úshin azamat ETsQ-ny asa qajet etpeidi. Biz bárimiz telefonnyń qulpyn saýsaq izimen nemese FaceID arqyly ashýdy ádetke ainaldyrdyq. Dál solai osy qosymshada ETsQ-ny biometriiaǵa bailap, qyzmetke tapsyrys bergen kezde ózińizdiń TouchID nemese FaceID arqyly suraýyńyzdy rastai alasyz», - dedi ol.
