Eýraziialyq ekonomikalyq komissiia Qazaqstannan Resei aýmaǵyna kiretin qyzanaq pen buryshqa qoiylǵan shekteýdi zańsyz dep tanydy.
Bul týraly Saýda jáne integratsiia ministrliginiń resmi saity habarlap otyr.
«2021 jylǵy 16 naýryzda Qazaqstan tarapynyń bastamasy boiynsha Eýraziialyq ekonomikalyq komissiia alqasy Qazaqstannan ákelinetin qyzanaq pen buryshqa Reseidiń tyiym salýy qanshalyqty zańdy degen máseleni qarady. Alqa músheleri men ókilderdiń pikirsaiys qorytyndysy boiynsha EEK Alqasy ótken jyldyń sońynda «Rosselhoznadzor» mekemesi belgilegen tyiymdy zańsyz jáne kedergi dep taný týraly sheshim qabyldady», - dep jazylǵan resmi málimette.
Endi Resei tarapy EEK Alqasynyń qabyldaǵan sheshimi boiynsha belgilengen tyiymdardy bir aidyń ishinde joiýy kerek.
Eske salsaq, 2020 jyldyń 16 jeltoqsanynan bastap «Rosselhoznadzor» Pavlodar oblysynan qyzanaq pen burysh ákelýge, al 2021 jyldyń 18 qańtarynan bastap Aqtóbe jáne Almaty oblystarynan qyzanaq ákelýge tyiym salǵan bolatyn. Bul sheshimin qazaqstandyq ónimderde qyzanaqtyń «qońyr ájim» virýsy (Tomato brown rugose fruit virus) bolýy múmkin degen ýájben bailanystyrǵan edi.
Saýda jáne integratsiia ministri Baqyt Sultanovtyń málimeti boiynsha, atalmysh tyiym salynǵan sátten bastap qazaqstandyq kásiporyndar 200 mln teńgeden asatyn tabystan qaǵylǵan.
«EEK alqasy bizdiń dálelderimizdi estidi jáne Resei biliginiń áreketterin tosqaýyl dep tanydy» - dedi Baqyt Sultanov.
