Qazaqstan Prezidenti Qasym-Jomart Toqaev 2025 jylǵa deiingi EAEO strategiiasy boiynsha Qazaqstannyń pozitsiiasyn qoldaǵan memleketterdiń basshylaryna alǵys aitty, dep habarlaidy QazAqparat.
«Koronavirýs infektsiiasynyń keń taralýy, shikizat taýarlary baǵasynyń quldyraýy, búkil álemdegi ekonomikalyq belsendiliktiń birden báseńdeýi – bizdiń elderdiń ekonomikalaryna áserin tigizdi. EYDO resmi esebine sáikes, 2020 jyly álemdik jalpy ishki ónim 4,5 paiyzǵa azaiady. Dúniejúzilik banktiń boljaýynsha, damýshy elderde JIÓ 2,5 ese tómendeidi. Shyntýaitynda osy toptaǵy elder úshin bul retsessiia keiingi 60 jylda bir kezdesken daǵdarys. Jan basyna shaqqandaǵy tabys biyl 3,6 paiyzǵa azaiady. Jaǵymsyz jailar ekonomikalyq odaq aiasyndaǵy saýdaǵa da óz áserin tigizbei qoiǵan joq. Osy jyldyń 9 aiyndaǵy ózara saýda 13 paiyzǵa azaiyp, 39 mlrd dollardy kórsetti. Eýraziialyq ekonomikalyq odaqtyń ózara taýar ainalymy odan da qarqyndy túrde 19 paiyzǵa azaiyp, 447 mlrd doldardy qurady. Osynyń bári de rezervti izdeýde, ekonomikalyq áleýettiń ósimin qamtamasyz etý mindetin keiinge ysyrýǵa bolmaitynyn kórsetedi», - dedi Qasym-Jomart Toqaev otyrysta.
Qazaqstan Prezidenti óz sózinde ekonomikalyq odaq jumysyn bastaǵaly beri Qazaqstannyń ekonomikalyq odaqtaǵy memlekettermen ózara saýdasy 33 paiyzǵa óskenin jetkizdi.
«Eksport 25 paiyzǵa kóbeidi. Ózara birlesken kásiporyndardyń sany eki ese artyp, 13 myńǵa jetti. Ekonomikalyq odaqpen yntymaqtasýǵa basqa da memleketter asyǵyp otyr. EAEO janyndaǵy baqylaýshy mártebesi Ózbekstan men Kýba memleketine beriledi. Bul baǵyttaǵy qadam aýqymdy perspektivalarǵa jol ashar degen senimdemiz», - dedi ol.
Qasym-Jomart Toqaev Ózbekstannyń eýraziialyq jobaǵa qatysýy – ekijaqty qarym-qatynasty da nyǵaita túsetinine senim bildirdi.
«2025 jylǵa deiingi EAEO-nyń strategiiasyna jeke nazar aýdarý kerek. Osy jyldyń mamyr aiynda ózderińiz biletindei, keibir daýly tustaryna bailanysty men ózimniń oiymdy bildirip, ol jobamen áli de jumys júrgizilýi kerektigin aitqan edim. Bul pozitsiiany, bizdiń ustanymdy qoldaǵan áriptesterime – memleket basshylaryna alǵys aitamyn. Úkimetter men komissiia strategiiany qaida tolyqtyrýda, zańnamalarlyń úilesimdiligin qarastyratyn túzetilgen sharalarmen birge mazmundy ári konstrýktivti jumys júrgizýde. Úshinshi eldermen saýda kelisimin jasaýda qatysýy usynylǵan komissiianyń quzyreti qaita qaraldy. Endigi kezekte komissiia tek sol múshe-memlekettiń talap-tilegi boiynsha ǵana ekijaqty saýda kelisimine qatysa alady. Menińshe, bul oilastyrylǵan amal», - dedi Prezident.
