QR Premer-Ministri Asqar Mamin Eýraziialyq úkimetaralyq keńes (EÚAK) otyrysyna tóraǵa retinde qatysyp, onda EAEO-ny pandemiiadan keiingi damytýdyń kún tártibin qalyptastyrý qajet ekenin atap ótti, dep habarlaidy primeminister.kz.
«Bizdiń elderimiz daǵdarystan keiingi qalpyna kelý kezeńine birtindep kóship jatyr. Elderimiz júzege asyryp jatqan jappai vaktsinalaý qarqynyn dáiekti túrde arttyrý qysqa merzimdi perspektivada EAEO-nyń qazirgi daǵdarystan shyǵýy týraly aitýǵa múmkindik beredi», — dedi A. Mamin.
Úkimet basshysy Eýraziialyq ekonomikalyq odaq elderi arasyndaǵy ózara saýda kórsetkishteriniń jaqsarǵanyn, óndiristik saladaǵy ósimniń qalpyna kelýin jáne qyzmet kórsetý sektoryndaǵy iskerlik belsendiliktiń artqanyn atap ótti. Biylǵy qańtar-aqpan ailarynda EAEO-nyń ózara saýdasy $9 mlrd qurady, bul ótken jyldyń sáikes kezeńimen salystyrǵanda 6,8%-ǵa artyq. QR Premer-Ministri ortaq óndiristik júielerdi qalyptastyrý qarqynyn edáýir jedeldetý, ónerkásiptik kooperatsiiany, EAEO-nyń qaita óńdeý áleýetin arttyrý jáne shoǵyrlandyrý qajettigin atap ótti.
«Bizdiń elderimiz elektromobilderge arnalǵan batareialardy, sirek kezdesetin metaldardy, «jańa materialdardy», qosylǵan quny joǵary AÓK ónimderin jáne t. b. qosa alǵanda, ónimder men qyzmetterdiń barlyq derlik strategiialyq mańyzdy túrleri boiynsha óndiristerdi qalyptastyrýda kúsheiip kele jatqan básekelestikke qosylý turǵysynan adami da, resýrstyq ta áleýetke ie», — dedi Mamin.
Qazaqstan Úkimetiniń basshysy ónerkásiptik kooperatsiia jobalaryn, onyń ishinde memlekettik jáne kvazimemlekettik qarajattyń qatysýymen qarjylandyrýdyń qosymsha kózderin qalyptastyrýdyń mańyzdylyǵyn atap ótti. Biyl 28 sáýirde qol qoiylǵan Qazaqstan, Resei jáne Birikken Arab Ámirlikteriniń tikelei investitsiialar qorlary arasyndaǵy teń investitsiialaý týraly kelisimdi mysal retinde keltirdi.
QR Premer-Ministri taýarlar men qyzmetterdiń ózara saýdasyna jasandy kedergiler jasaýǵa jol bermeý, shekaralardan ótý rásimderiniń tiimdiligin arttyrý, monitoring jáne baqylaý júieleriniń derekterimen almasý jumysyn kúsheitýge shaqyrdy. EAEO aiasynda infraqurylymnyń sapasy men qoljetimdiligin arttyrý jumysyn jalǵastyrýdyń mańyzdylyǵy atap ótildi.
Úkimet basshysy qalyptasqan baǵyttardyń senimdiligine jáne jekelegen óńirlerdiń tranzittik áleýetine qatysty belgisizdikke bailanysty alańdaýshylyqtyń ósýine orai halyqaralyq kólik aǵyndaryn aýqymdy qaita bólýdi eskere otyryp, EAEO-nyń halyqaralyq tasymaldaý naryǵyndaǵy óz úlesin ulǵaitýǵa jáne buǵan deiin qoljetimsiz bolǵan syrtqy óndiristik tizbekterge qosylýǵa múmkindigi bar ekenin atap ótti.
«Atalǵan qarqyn bizdiń tranzittik kórsetkishterimiz arqyly kórinis berýde. 2020 jyly pandemiiaǵa qaramastan, EAEO aýmaǵy arqyly Qytai-Eýropa-Qytai baǵyty boiynsha konteinerlik tasymaldardyń ósýi 64%-dy (511,8 myń JFE) qurady. Osy jyldyń alǵashqy úsh aiynda ósim 133%-dy (147 myń DEF) qurady», — dedi A. Mamin.
Otyrys barysynda ónerkásiptik yntymaqtastyqtyń 2025 jylǵa deiingi negizgi baǵyttary bekitildi. Qujat ortaq naryqtyń áleýeti negizinde EAEO-ǵa múshe memleketterdiń ónerkásiptik óndirisiniń ozyq ósýin yntalandyrýǵa, EAEO-ǵa múshe memleketterdiń ónerkásiptik kásiporyndarynyń básekege qabilettiligin arttyrýǵa, birlesip óndirilgen taýarlardyń syrtqy naryqtarda eksportyn ilgeriletýge, innovatsiialardy jáne ónerkásiptiń tsifrlyq transformatsiiasyn birlesip yntalandyrý jolymen ónerkásiptik óndiristi tehnologiialyq damytýdyń jańa deńgeiine ótýge baǵyttalǵan.
Jerdi qashyqtan zondtaýdyń integratsiialanǵan ǵarysh júiesin qalyptastyrý, ózara saýdadaǵy kedergilerdi odan ári joiý, úshinshi eldermen elektrondyq saýdany retteý tártibi, EAEO aýyl sharýashylyǵy ónimderiniń naryǵyn ósimdikterdiń qaýipti virýstarynyń taralýynan qorǵaý máseleleri jáne basqa da máseleler qaraldy. Eýraziialyq ekonomikalyq komissiia men Ózbekstan Úkimeti ózara is-qimyl týraly memorandýmǵa jáne ony iske asyrý jónindegi is-sharalar josparyna qol qoidy.
Sondai-aq otyrysqa Armeniia Premer-Ministriniń m. a. Nikol Pashinian, Belarýs Úkimetiniń basshysy Roman Golovchenko, Qyrǵyzstan Úkimetiniń basshysy Ýlýkbek Maripov, Resei Úkimetiniń basshysy Mihail Mishýstin, Tájikstan Úkimetiniń basshysy Kohir Rasýlzoda, Ózbekstan Úkimetiniń basshysy Abdýlla Aripov, Moldova Premer-Ministriniń m. a. Aýrelii Chokoi (onlain-rejimde), Túrikmenstan Ministrler kabineti tóraǵasynyń orynbasary Serdar Berdymýhamedov qatysty. Kýba Premer-Ministri Krýs Manýel Marrero beine málimdeme jasady.
