Eýraziialyq ekonomikalyq odaqtyń biryńǵai agrarlyq jáne azyq-túlik naryǵyn qurýymyz qajet. Bul týraly Joǵary eýraziialyq ekonomikalyq keńestiń otyrysynda Qazaqstan Prezident Qasym-Jomart Toqaev aitty, dep habarlaidy QazAqparat.
«BUU málimetterine sáikes, 2020 jyldyń qorytyndysynda azyq-túlik taýarlarynyń álemdik baǵasy sońǵy úsh jylda eń joǵary boldy. Osy jyldyń basynan bastap álemdik azyq-túlik baǵasynyń indeksi 116 tarmaqty qurady. 2030 jylǵa qarai azyq-túlikke suranys keminde 35 paiyzǵa artatyndyǵy kútiledi. Bul alańdatarlyq tendentsiia. Bizdiń elderimizdiń árqaisysy azyq-túlik taýarlary óndirisiniń kólemin arttyrýǵa qajetti áleýetke ie. Degenmen, ishki naryqty qorǵaý jónindegi shekteý is-sharalary agroónerkásip kesheniniń damýyn tejep, azyq-túlik tapshylyǵyna alyp kelýi múmkin»,- dedi Memleket basshysy.
Qazaqstan Prezidenti jekelegen jaǵdaida shekteý is-sharalaryn ýaqytsha qoldanýǵa bolatyndyǵyn, biraq, mundai shekteýler odaq elderine taralmaýy tiistigin basa aitty.
«Bizdiń aldymyzda agroónerkásip keshenine investitsiia kólemin arttyrý, odaqtyń biryńǵai agrarlyq jáne azyq-túlik naryǵyn qurý mindeti tur. Aldyńǵy qatarly jáne innovatsiialyq tehnologiialardy engizý, qosylǵan joǵary quny bar azyq-túlik óndirisin arttyrý maqsatynda bizdiń agro-ǵylymi mekemelerimizdiń ózara is-qimylyn kúsheitýimiz qajet. Aýyl sharýashylyǵy ónimderin úshinshi elderdiń naryqtaryna eksporttaýdy da arttyrý boiynsha birlesken kúsh-jigerimizdi jandandyrý qajet dep esepteimin. Komissiiaǵa bul baǵytta jan-jaqty jáne naqty usynystar ázirleýdi tapsyrý maqsatqa sai dep oilaimyn», - dedi Qasym-Jomart Toqaev.
