Memleket basshylarynyń Joǵary eýraziialyq ekonomikalyq keńesiniń otyrysynda ekonomikalyq odaqtyń klimat týraly málimdeme qabyldaýy josparlanǵan. Bul týraly Qazaqstan Prezidenti Qasym-Jomart Toqaev málimdedi, dep habarlaidy QazAqparat.
«Qazaqstan klimattyq kún tártibindegi jumysty ulttyq deńgeide ǵana emes, óńirlik deńgeide de belsendi júrgizýde. Biyl Qazaqstan Eýraziialyq ekonomikalyq odaqqa tóraǵalyq etedi. Erteń Joǵary eýraziialyq ekonomikalyq keńestiń otyrysynda memleket basshylary odaqtyń klimattyq kún tártibi týraly málimdemeni qabyldaýdy josparlap otyr. BUU men Parij kelisiminiń ornyqty damý maqsatyna qol jetkizý úshin ekonomikalyq yntymaqtastyqty damytý nietin rastaý josparlanyp otyr», - dedi Qasym-Jomart Toqaev.
Memleket basshysynyń aitýynsha, EAEO deńgeiinde jańartylatyn jáne balamaly energiia kózderin engizý, kómirtegi az tutynatyn kólik qatynasyn damytýǵa baǵyttalǵan tiimdi tásilder men tehnologiialardy paidalaný máseleleri ózekti bolyp otyr.
«Eýraziialyq ekonomikalyq odaq aiasyndaǵy ónerkásip pen tehnologiiadaǵy tyǵyz ekonomikalyq bailanystardy eskersek, birlesken is-qimyldar tabysqa jetýdiń sózsiz kepili bola alady», - dep atap ótti Memleket basshysy Nur-Sultanda ótip jatqan «Parij kelisimi men Qazaqstannyń kómirtegi beitaraptylyǵy maqsattaryna qol jetkizý joldary» atty halyqaralyq konferentsiiada.
