Videokonferentsiia formatynda ótken Joǵary Eýraziialyq ekonomikalyq keńestiń qorytyndysy boiynsha EAEO-ǵa múshe memleketterdiń basshylary birlesken málimdeme jasady, dep habarlaidy QazAqparat.
«Biz, Joǵary Eýraziialyq ekonomikalyq keńestiń músheleri, memleketterimizdiń arasyndaǵy tyǵyz saiasi, ekonomikalyq, áleýmettik jáne tarihi bailanystardy eskerip, 2014 jyldyń 29 mamyryndaǵy EAEO týraly shartta kórsetilgen maqsattar men qaǵidattarǵa adal ekenimizdi qýattai otyryp, Dúniejúzilik densaýlyq saqtaý uiymy pandemiia dep jariialap, qoǵamdyq densaýlyq saqtaý salasyndaǵy tótenshe jaǵdai retinde sipattalǵan COVID-19 – koronavirýs infektsiiasynyń halyqaralyq deńgeidegi mańyzǵa ie bolyp, halyqtyń qozǵalysyn shektep, taýar jáne qyzmet saýdasyn qiyndatyp turǵanyn, jahandyq qarjylyq jáne shikizat naryǵynda qubylmalylyqty týyndatqanyn, COVID-19 pandemiiasy kezinde EAEO múshe memleketterdiń azamattaryn qoldaý jáne adamdardyń densaýlyǵy men ál-aýqatyn qamtamasyz etýde ujymdyq kúsh biriktirý qajettigin erekshe atap ótip, álemdik jáne aimaqtyq ekonomika úshin dezintegratsiia qaýpi týǵanyn nazarǵa ala otyryp, bul qaýipke birlese otyryp, qarsy turý týraly sharalardy biriktirýge daiyn ekenimizdi habarlaimyz», - delingen EAEO kóshbasshylarynyń birlesken málimdemesinde.
EAEO uiymynyń memleket basshylary COVID-19 pandemiiasynyń jaǵymsyz saldaryn joiý boiynsha birlesken jumysty jalǵastyrýǵa, qol jetkizilgen integratsiialyq yntymaqtastyq pen EAEO-ǵa múshe memleketterdiń ekonomikalyq damýyn qoldaýǵa, memleketterimizdegi áleýmettik jáne makroekonomikalyq turaqtylyqty qamtamasyz etýge, iskerlik jáne investitsiialyq belsendilikti qoldaýǵa daiyn ekenderin málimdedi.
«COVID-19 pandemiiasymen kúres aiaqtalmai qalǵan kooperatsiialyq bailanystardyń úzilýine, halyqaralyq saýdanyń toqtaýyna, investitsiialyq tartymdylyqtyń báseńdeýine alyp kelmeýi kerek degen nyq senimdemiz», - delingen qujatta.
EAEO basshylary sonymen qatar memleketterdiń bárin halyqaralyq yntymaqtastyqty qoldaýǵa, senimdi nyǵaitýǵa, qarýly qaqtyǵystar men saýda soǵystaryn toqtatýǵa, halyqaralyq zańdardy qatań saqtaýǵa shaqyrdy.
«Biz halyqaralyq qaýymdastyqtardyń birligi men álemdik ekonomikanyń turaqtylyǵyna, taýarlardyń, onyń ishinde áleýmettik mańyzy bar tamaq ónimderiniń, meditsinalyq maqsattaǵy buiymdar men dári-dármektiń, jeke qorǵanys quraldarynyń qozǵalys erkindigi qaǵidattarynyń saqtalýy jón dep esepteimiz», - dedi EAEO memleket basshylarynyń birlesken málimdemesinde.
Sonymen birge, qujatta EAEO elderiniń jedel jáne júielik sipattaǵy sharalary COVID-19 pandemiiasynyń integratsiialyq birlestiktegi elderdiń ekonomikalaryna yqpalyn azaitýǵa jáne birtutas ekonomikalyq keńistiktiń jumys isteýin qamtamasyz etýge baǵyttalǵany da atalyp ótken.
«Biz búkil álemde COVID-19 pandemiiasynan týyndaǵan shekteýler májbúrli shara ekenin jáne pandemiia toqtaǵannan keiin adam ómiri men densaýlyǵyna tóngen qaterlerdiń bári joiylady dep sanaimyz», - delingen birlesken málimdemede.
EAEO kóshbasshylary COVID-19 pandemiiasymen kúres aiasynda bir-birine qajetti kómek kórsetýdi jalǵastyrýǵa, densaýlyq saqtaý júiesin nyǵaitýǵa, infektsiialardyń aldyn alyp, diagnostikalaý jáne emdeý quraldaryn qurý salasynda birlesken zertteýler júrgizýge, epidemiiaǵa qarsy áreket etý algoritmderin jetildirýge nietti ekenin atap ótti.
Osy maqsatta EAEO jáne EEK múshe memleketteriniń úkimetterine, ortalyq (ulttyq) bankterine COVID-19 koronavirýs infektsiiasynyń taralýyn boldyrmaý jáne aldyn-alý, ekonomikalyq yntymaqtastyqty nyǵaitý, ishki, sonyń ishinde azyq-túlik, naryqtar jumysynyń turaqtylyǵyn saqtaý jáne memleketter azamattaryna qoldaý kórsetý mindetteri tapsyryldy.
«Integratsiianyń artyqshylyǵy bizdiń memleketterimizge jáne halyqtarymyzǵa osy synaqty laiyqty túrde eńserýge múmkkindik beretinine nyq senemiz», - delingen qujatta.
