Biyl Qazaqstan Eýraziialyq ekonomikalyq odaqta tasymaldaýdy qadaǵalaý úshin navigatsiialyq plomba qoldaný týraly kelisimge qol qoiýǵa nietti, dep habarlaidy QazAqparat Memlekettik kirister komitetine silteme jasap.
Kelisimge qatysty jumysty 2017 jyldan bastap EAEO elderi sarapshylary jáne Eýraziialyq ekonomikalyq komissiia qyzmetkerleri júrgizgen.
«Jumys kúrdeli boldy, barlyq múddeli memlekettik organdar men taraptardyń biznes qoǵamdastyǵy qatysty, kóptegen pikir men ustanym boldy. Memleketishilik kelisýdiń eki kezeńi ótkizildi. Búgingi tańda barlyq kelispeýshilikter joiyldy», - dedi komitet ókili.
Jalpy kelisim navigatsiia plombasyn qoldana otyryp, taýardy EAEO-ǵa múshe eki jáne odan da kóp memlekettiń aýmaǵy boiynsha ótkizý kezinde olardy qadaǵalaý múmkindigin kózdeidi. Árbir el navigatsiia plombasyn qoldaný jónindegi jumysty uiymdastyrýdy júrgizetin ulttyq operatory bolady.
Bul rette kóliktiń ereksheligin eskere otyryp, taýarlardyń sanatyna bailanysty ótpeli kezeńder kózdelgen. Bul tasymaldaýdyń árbir kezeńin qadaǵalai otyryp, navigatsiia plombasyn qoldaný protsesiniń tiimdiligin jetildirýge múmkindik beredi.
«Biznes úshin osy kelisimniń artyqshylyqtary EAEO keńistiginde óz taýarlarynyń qaýipsiz tranziti múmkindiginde, EAEO baqylaýshy organdary tarapynan baqylaýdyń qosymsha nysandary men sharalaryn alyp tastaýda bolyp otyr. Iaǵni, eger plomba salynǵan bolsa, onda EAEO-nyń árbir memleketinde taýardy, al keibireýinde bir baǵyt úshin birneshe retten tekserýdiń qajeti joq. Mundai jaǵdai shyǵyndy aitarlyqtai azaitady», - dep atap ótti Memlekettik kirister komitetinde.
Memleket osy kelisimnen halyqaralyq tasymaldardyń ashyqtyǵyna, «jalǵan tranzit» pen «jalǵan importty» joiýǵa jáne tiisinshe qazynaǵa túsetin kiristiń ulǵaiýyna qol jetkizbek.
Qazirgi ýaqytta qujattyń jobasy qoǵamdyq talqylaý úshin legalacts.egov.kz saityna ornalastyrylǵan.
