23 jeltoqsan kúni ótken Eýraziialyq ekonomikalyq komissiia keńesi otyrysynyń qorytyndysy boiynsha sáikestendirý quraldarymen tańbalaýǵa jatatyn sút ónimderiniń jekelegen túrleriniń tizbesi bekitildi. Bul týraly búgin brifing barysynda EEK Alqasy Tóraǵasynyń kómekshisi Iia Malkina málim etti, dep habarlaidy QazAqparat.
«EEK keńesi sáikestendirý quraldarymen tańbalanýǵa jatatyn taýarlardyń – sút ónimderiniń jekelegen túrleriniń tizbesin bekitti. Atap aitqanda, osy tizbedegi tańbalanbaǵan taýarlardy ainalymǵa jiberýge tyiym salýdy engizý merzimderi anyqtaldy», – dep atap ótti I.Malkina.
Qujatta Odaqtyń búkil aýmaǵynda taýarlardy mindetti tańbalaýdy engizýdiń úsh kezeńi usynylǵan:
1. 2021 jylǵy 1 maýsymǵa deiin – irimshikter úshin, sondai-aq balmuzdaq jáne quramynda kakao bar nemese joq taǵamdyq muzdyń ózge de túrleri úshin.
2. 2021 jylǵy 1 qyrkúiekke deiin – saqtaý merzimi 40 táýlikten asatyn sút ónimderi úshin (sút, kilegei, iogýrt, airan, súzbe, sary mai).
3. 2021 jylǵy 1 jeltoqsanǵa deiin – saqtaý merzimi 40 táýlikke deiin qosa alǵanda sút ónimderi úshin.
EEK ókili atap ótkendei, sheshim qabyldanyp, tańbalaýdy qajet etpeitin ónim anyqtaldy. Bul, mysaly, úsh jasqa deiingi balalarǵa arnalǵan taǵam. Taýar qaldyqtaryn tańbalaý da júzege asyrylmaidy. Qabyldanǵan sheshimge sáikes, tańbalaýdy engizý kúnin ár el derbes aiqyndaityn bolady.
«Resei Federatsiiasynda tańbalanbaǵan ónim ainalymyna tyiym salýdyń kórsetilgen merzimderi bar sút ónimderin tańbalaýdy engizý týraly sheshimder qabyldanyp qoiǵanyn eske salamyn», – dep habarlady I. Malkina.
